هذا ليس مقالا و لكنها مناقشة بين أعضاء منتداي السابق "موسوعة العندليب" افتتحها شقيقي عمرو ثم توالت التعليقات تباعا و قد بدأت هذه المناقشة في الساعة الثامنة و خمسين دقيقة مساء من الشهر الحادي عشر الميلادي في عام ألفين و سبعة و لن أتحدث عنها سأدعكم تقرؤونها كما كتبناها بدون أية تعديلات:
عمرو:
منذ أيام قرأت عن تقرير للوكالة الدولية للطاقة الذرية يصرح باكتشاف آثار لليورانيوم المخصب بمصر وقد كان الرد المصري أن هذه الآثار قد تكون نتجت عن بعض كميات اليورانيوم المستوردة والتي تستخدم في المفاعل البحثي المصري للأغراض الطبية والزراعية. "هرشت" قليلا في رأسي ثم أرجعت ظهر كرسي الكمبيوتر قليلا و تركت نفسي لأحلام اليقظة..... "ياسلام يا واد يا عمرو لو احنا في الدرا كدة عمالين نصنَّع في سلاح نووي وماحدش واخد باله و أكيد بقي البرنامج النووي اللي جمال باشا مبارك قال عليه ده عشان بقي نتوسع في الإنتاج أهو كدة بقي الواحد عرف الفلوس اللي عمالة تختفي دي راحت فين والمشاريع اللي مش ولا بد دي أكيد ستاره برضه ياسلام يا مصر عظيمة يامصر يا أرض النعم يا رب قدرني قبل ما أموت أبوس إيد كل واحد في الحكومة من أول عم عبده بتاع الشاي لغاية أحمد باشا نظيف واعتذرلهم عن سوء الظن اللي الواحد ظنه فيهم طول السنين دي والراس الكبيرة بقي ده ليه يوم لوحده عشان الواحد يعرف يكفر عن ذنبه في حقه وندر عليا بعد عمر طويل ان شاء الله لشيل الباشا الصغير علي كتفي وألف بيه مصر كلها من اسكندريه لأسوان ومن طابا للسلوم وأنا عمال أغني ياجمال يا حبيب الملايين ياجمال...." أفقت علي صوت والدتي العزيزة وهي تقول "يابني ارفع بنطلونك ده شويه كده حتاخد برد" قلت لنفسي "الله يكسفَك" و أغلقت الكمبيوتر ودخلت أنام.
العبد لله:
فعلا و الله الواحد بيقول الفلوس بتروح فين أتاريها في مشاريع اليورانيوم. بس سؤال برئ: ياترى ينفع يخدونا يشغلونا في واحد من المشاريع دي ؟ أكيد المرتبات حتكون حلوة. و بالنسبة للبنطلون أنت من ساعة ما خسيت يا عمرو بقت هدومك القديمة عايزه تتضيق حبتين ابقى ضيقها يا حبيبي لا تحلم مرة حلم يودينا كلنا في داهية.
عمرو:
ربنا يستر بقي يا أحمد والله الواحد أحسنله يلبس جلاليب وعبايات بعد كده.
العبد لله:
ممكن تمشيها قفاطين و الشعب كله يعمل نفس الموضوع عشان نمشي سياسة التقشف و نوفر الفلوس و اهو في الآخر كله بيغطي.
أحمد سعد:
اسمحولى بقى ... نبص على الناحية التانية، أقصد الجانب الآخر للحلم الجميل نكتشف فجأة ان عندنا يورانيوم مخصب وبالتالى سلاح نووى وده تفسير منطقى لاختفاء الفلوس من البلد ومرة واحدة نصحى على تحذير امريكى لمصر بايقاف نشاطها النووى ... وطبعاً احنا مش حانرضى بأى تحذيرات أو بأى تدخل أجنبى فى شئوننا الداخلية - والتى سيصبح الدخول اليها سهلاً بعد ارتداء الشعب كله للقفاطين - ونقوم بقى كلنا ونثور ونشجب ونندد بالتدخل الأمريكى السافر فى الشئون الداخلية المصرية و....... ربنا يستر بقى.
العبد لله:
كويس إنك نبهتني لحكاية سهولة التدخل في السياسة الداخلية بعد ارتداء الشعب كله للقافطين عشان ابقى أعمل حسابي ساعتها و البس بنطلون تحت القفطان.
سامر:
انا بقول نقضيها عبايات مغربي أحسن. ولو الموضوع حيبقي كدا احنا نعمل صفقة قفاطين وكلاسين من السعودية يمكن نستفاد بحاجة.
عمرو:
الله يابو حميد حرب العراق والأزمة الإقتصادية برضه تاعبين أمريكا قوي فما تهيأليش إنهم حيعملو حاجة أكترمن الكلام ماهي إيران أهه عمالة تبرطع نووي وماحدش بيعملها حاجة غير الكلام..ولا إيه؟
أحمد سعد:
بس دى ايران ... واخد بالك انت ايران زى كوريا كدة بالظبط ... انما بقى لما تيجى لمصر يبقى الوضع حاجة تانية يارب تكون فهمت قصدي.
الحاج (السيد الوالد):
أحسن لكم تبطلوا أحلام وتتغطوا كويس وبلاش كلام في السياسة الداخلية والخارجية وكفاية يكون عندنا " نوى " البلح.
مينا رزق:
وايه يعني اليورانيوم يعني مثلا هو اللي هايحمينا ولا يعني هايعمل للمصريين قيمة بصراحة انا شايف إننا مش محتاجين نخصب إحنا كفاية علينا ناكل قمح مخصب جاهز ومشع جاهز . صدقوني انا بسمع كتير بس يمكن الفرق بيني وبين اي حد اني قريب من اللي بيتكلموا ومن بعض القصص ان مراكب المحملة بالقمح سواء الامريكي او الاوكراني او الروسي ترفض وتذهب الي عرض البحر وتعود مرة تانية وتتداول في بلدنا وكان شيئا لم يكن . وقصة اخري مؤكدة من اشخاص كثيرين ان في احد المرات وجدوا ان احدي المخازن اشتعلت به النار اكثر من مرة وفي كل مرة تاتي المطافي لتطفئه يشتعل مرة اخري وهذا بسبب الاشعاع الذي يحتويه. ياريت ياجماعة ماتخافوش الكلام ده بيحصل في بلد تانية غير مصر لاني الحكومة مراعية ربنا فينا جدا والدليل علي كلامي انهم مسكوا المتسبب في حادثة قطاري العياط وهو مساعد سواق القطر الثاني وقدموه للمحاكمة مع عامل التحويلة المتوفي والجاموسة.
محمد مسعد:
لو امريكا شافت الكلام دة حتعملو دليل اننا عندنا نووي وحيقولو علينا ارهاب ( اسف تنظيم قاعدة) وطبعا بقية الدول محتصدق وحيجو يحربونا علشان يسرقو البلد(اسف اقصد الي فاضل من البلد).
العبد لله:
و الله الناس كلها بقالها فترة بطونها وجعاها و كلها مع بعض إيه السبب ؟ الظاهر موضوع القمح. بس كويس و الله أهو الإشعاع يخلينا نشع من جوه و بطونا تنور و ده حيساعد الحكومة على توفير فاتورة الكهربا و الزبالة لأن المكان اللي بتيجي منه فضلات البني آدمين اللي بتسبب الزبالة حتبقى بتنور و اعتقد إن ده كمان عرفنا سبب دمج فاتورة الكهربا مع الزبالة.
