مع الأسف العنصرية دي موجودة في أي حد شايف نفسه مختلف عن الناس فيه ناس المفترض إنهم ملتزمين دينيا و بيقولوا نفس الكلام ده اللي إحنا محتاجينه إننا نرتقي بنفسنا و بأخلاقنا و نفتكر أدياننا بتقولنا إيه و بتحضنا إزاي على التسامح و المعايشة و إن النبي صلى الله عليه و سلم قال لما قابله شخص ارتعد من رؤياه: "هون عليك فأنا ابن امرأة كانت تأكل القديد بمكة"
فيه حد كان منتمي لكيان معين أنا مخالف ليه في الرأي حصلت حادثة معينة حد فيها اتقتل لقيته كاتب حاجات بؤكد فيها على ليه الشخص ده ربنا اختار له الموتة دي و هو حيروح فين في الآخرة ؟! و كإنه و العياذ بالله دخل في علم الله و عرف ربنا بيختار إزاي و على أي أساس حيحكم على شخص و نسى إنه حتى النبي عليه الصلاة و السلام و سائر الأنبياء محدش فيهم قال على مين حيدخل الجنة و مين حيدخل النار "باستثناء البعض طبعا زي العشرة المبشرين بالجنة"
فمع الأسف الأسلوب ده بقى عامل زي فعل و رد فعل لازم نعرف إن الاختلاف ده من الطبيعة
"يا أيها الذين آمنوا إنا خلقناكم من ذكر و أنثى و جعلناكم شعوبا و قبائل لتعارفوا إن أكرمكم عند الله أتقاكم"
بعد الآية الكريمة دي الناس بتفكر تاني في إيه ؟ و بيتعاملوا مع بعض على أي أساس ؟ و عندهم المنهج أهه واضح و صريح ؟!
