مشكلتي مع الإخوان من البداية هو فكرهم و منهجهم أنت عارف إني أبطلت صوتي في انتخابات الإعادة بين مرسي و شفيق و كتبت ساعتها مقال "نعم أنا باطل" عشان أشرح فيه وجهة نظري في إبطال صوتي و من ضمن الكلام كان إني مينفعش اختار شخص أنا عارف كويس إنه مجرد خيال مآتة فيه ناس حطاه عشان تحركه زي ما هي عاوزه و بين شخص تاني على الأقل مشكوك في تورطه في دم المصريين
إحنا معاشرين الإخوان و زي ما أنت قلت منهم أصحابنا و معارفنا و قاريبنا و عشان كده أنا عارف فكرهم كويس عامل إزاي من تعاملي معاهم على مدى السنين دي حتى الناس اللي كنت شايفها محترمة و معتدلة الفكر بانت على حقيقتها في الأحداث الأخيرة تمرد فكرتها عجبتني لأنها حتى لو مكانش ليها شكل قانوني صحيح يقدر إنه يعزل الحاكم لكنها بتبين كمية الناس من الشعب اللي مش عايزه الراجل ده قد إيه لإنهم كانوا بيقولوا إن أغلب المصريين مع مرسي و حكم الإخوان و تمرد أثبتت إن ده مش صحيح مش حناقشك في فكرة إذا كان اللي حصل يوم 30 ثورة و لا إنقلاب عسكري لكن أيا كان فهو كان لازم يحصل لإن أولا الرئيس اللي ماسك البلد هو رئيس صوري و مكتب إرشاد جماعته كان هو اللي بيحكم و يوجهه و ده كلنا حتى المؤيديين عارفينه من أول ما رشح نفسه في الانتخابات تاني حاجة البلد اتخربت من كل النواحي داخليا و خارجيا أفسدوا علاقتنا مع أغلب الدول ده كانوا حيضيعوا مننا النيل كمان ناهيك طبعا عن المهازل اللي كانت بتحصل منها الاجتماع السري اللي اتذاع على الهوا أو تكفير المعارضين في برامج المؤيديين على قنواتهم أو حتى قدام الرئيس نفسه اللي مقالش كلمة اعتراض حتى أكيد مؤيدين الإخوان كتير لكن بكل حال من الأحوال مش قد المعارضين و أنت أكيد نزلت بنفسك و شفت أو حتى شفت على التلفاز أعداد الناس في ميادين مصر كانت قد إيه الإخوان أكيد اتظلموا و اتهانوا على مدى عمرهم الطويل و أنا كتبت ده في مقال "مذبحة الإخوان" لكنهم ظلموا و أهانوا و كفروا الناس أكتر و منهم كمان الناس اللي كانت بتقف جنبهم و تساعدهم أيا كان اللي حصل فهو كان لازم يحصل لإنهم مكانش ينفع يستنوا أكتر من كده و لازم يعرفوا إنهم أيا كان مؤيديهم و عددهم فهما مش قد المعارضين ليهم و لفكرهم و كل اللي بيعملوه دلوقت هما اللي بيقصوا نفسهم من الساحة ساحة الوطن قبل ساحة السياسة
