فيه ناس بتستفسر مني بعض الاستفسارات عن سلسلة "افرشي لي الملاية يا طاهرة" من غير ما أذكر الاستفسارات حاجاوب عليها على طول:
أنا كتبت في المقدمة إني باكتب عن نفسي و عن حياتي و عن مواقف حصلت لي فعليا و في السلسلة دي أنا مش باصدر أحكام على أشخاص أو بانتقد تصرفاتهم أنا بس باحكي اللي حصل مع بعض اللمسات الخفيفة كده و أفتكر اللي قروا الحلقتين مش حيلقوني غلطت في أي حد أو ذكرته بشكل لا يليق.
أنا مش حاسميهم كلهم أميرة و لا حاجة كل الحكاية إن الاتنين اللي حكيت عنهم في الحلقة الأولى كانوا بيحملوا نفس الاسم (اللي هو مش أميرة طبعا) و عشان كده طبيعي سميتهم نفس الاسم.
الناس اللي أنا ذاكر أسماءهم حقيقة هما أسرتي أو ناس أنا استأذنتهم و عشان ترتاحوا كلكم، أي حد يعرفني و بيقرا الكلام ده (حيتلط في الموضوع) و الحدق بقى اللي يعرف شخصيته لو حب إنه يصرح بده ليا أو على العام دي حاجة ترجع له.
السلسلة أنا مش عارف حتخلص إمتى أنا باكتب اللي بييجي في دماغي مع تحفظات طبعا معينة لكني حافضل أكتبها لحد أما مالاقيش حاجة أكتبها.
معنديش أي أهداف من السلسلة دي لما قررت أكتب حلقاتها أنا بس حسيت إني عايز أتكلم عن ده و أفضفض بيه و متتخيلوش إن ده حسن حالتي النفسية قد إيه.
باتمنى إن بقية الحلقات تعجبكم إن شاء الله و انتظروها.
