الفنان المرحوم حمدي أحمد كانت بدايته بطولة مطلقة قدام مجموعة من أهم نجوم مصر و بعد كده بدأت أدواره تقل مع إنه في نظر الكثيرين بيتمتع بموهبة ضخمة.
عادل إمام بدأ كممثل صغير بدور صغير و بدأت أدواره تكبر لحد ما بقى واحد من أهم نجوم مصر على الرغم من إنه في نظر الكثيرين موهبته مش ضخمة.
ما فيش أي قواعد لأي شيء ربنا بيسبب الأسباب و بيختار حاجات إحنا ما نعرفهاش جايز تكون البداية غير موفقة لكن النهاية تكون الأفضل، أهم حاجة إن أي إنسان يكون عارف هو بيعمل إيه و بيعمل كل اللي في وسعه و يقدر عليه.
أنا واحد من الناس دول اللي مستني فرج ربنا و على الرغم من كل الأمور السلبية اللي بتقابلني و عدم النجاح و إصابتي بالإحباط و اليأس إلا إني باحس بإني مش باستسلم و بافضل أحاول و فيه برضه حاجات تانية باقدر أنجح فيها و أوصل لها بتهون عليا و تصبرني.
إذا كانوا العباد غير عادلين فالله عادل هو ده اللي بيصبرني و بيديني الدافع إني أفضل أحاول و أقاوم لحد ما أوصل للي أنا عايزه.
