عشان الناس اللي سألت و بتسأل أكتر من مرة على السلسلة باكتب التوضيح ده
الناس اللي باتكلم عنهم في السلسلة هما:-
أولا: أميرة لأنها السبب في إني أكتب السلسلة كلها و هي الوحيدة لحد النهارده مع الأسف اللي مش قادر أتخلص من مشاعري ناحيتها على الرغم من إن الطريق إليها مسدود مسدود يا ولدي.
ثانيا: البنات اللي حاولت أرتبط بيهم أو اتعرفت عليهم فترة من حياتي و حملت لهم مشاعر ما اكتملتش.
ثالثا: ناس قابلتهم في حياتي أثروا فيا بشكل أو بآخر على شرط إنهم يكونوا بيقروا السلسلة و متابعين ليها و استأذنتهم و وافقوا لإني مش حاتعب نفسي إني أكتب عن حد مش مكلف خاطره يقرا أو يعلق.
السلسلة ساخرة مريرة اجتماعية فمش شرط إن كل الحلقات تفطسكم من الضحك بالعكس فيه حلقات كئيبة و حلقات فيها رسايل لأشخاص بعينهم و حلقات حتكون تمهيد لحلقات تانية، فاحكموا على السلسلة ككل مش كل حلقة منفصلة و ما تتوقعوش شيء بعينه لإني باكتب من غير تحضير و زي ما بتيجي معايا و العفوية دي هي السبب الرئيسي في نجاحها.
باشكركم على متابعتكم ليها و يا رب الحلقات اللي جاية تعجبكم.
