الحاجة اللي كنت باضحك عليها و شفتوها في المنشور الغريب اللي نشرته من يومين، كانت بسبب إنهم طلبوني تاني في شغل تبع جوجل، قريب من الشغل القديم بس أصعب، عشان كده كانت عودة للمسخرة مرة تانية.
الناس اللي عايزه تفتكر، تقرا المقال ده تاني و اللي ما قرتهوش أديكم شايفين التحذير اللي كاتبه و ذنبكم على جنبكم.
مش حاعرف أدخل كتير على الفيس الفترة اللي جاية لإن الشغل بقى وقته طويل جدا و كل يوم مش بآخد أجازات و أكبر وقت للراحة باخصصه عشان أروح التمرين بالإضافة لشغل تاني برضه بس أجلته لبعد ما شغل جوجل يخلص، ادعوا لي إن ربنا يقدرني على الشغلين دول و إني أعرف ألاقي فرص أحسن تخليني أكون إنسان أحسن من اللي أنا عليه دلوقت.
رغم كل الصعوبات و الظروف و عدم التوفيق في حاجات كتير باصادفها في حياتي، ربنا بيديني أمل دايما عشان أقدر أخرج من الحالة السيئة اللي أنا فيها و أقدر أكمل الطريق اللي مش قادر أعرف آخرته إيه و الأمل ده هو اللي باعيش بيه و بيخليني بين الوقت و التاني ابتسم و اتشجع و أقول إني حاقدر؛ حاقدر أكون فعلا إنسان أحسن و حاقدر أغيّر من نفسي و من حياتي و حاقدر أعمل كل اللي عليا، حاقدر أخلي حبي اللي من طرف واحد يكون حافز ليا مش حاجة تدمرني و تقضي عليا، حاقدر ألاقي ربنا بيستجيب لدعايا و بيكتب لي اللي باتمناه و أحسن.
