خاتمة السلسلة، ناس كتير زعلوا منها بسبب إنهم عارفين إني باتكلم عن نفسي و عاشوا أحداثها و كانوا يتمنوا إني أنهي الموضوع بشكل أفضل من كده، و ناس شايفين إني باقدم تنازلات و مش عاجباهم وجهة نظري ناحية الموضوع و ناس مش حابين تغيير اسم السلسلة و عشان كده أنا باكتب ليكم كلكم التوضيح ده:
أولا: حاولوا تشيلوا من دماغتكم إني باتكلم عن نفسي و بصوا لها بس كعمل أدبي و حدوتة عجبتكم بتقروها.
ثانيا: بغض النظر عن كل اللي كتبته في السلسلة و في الخاتمة اللي زعلتكم قوي بالذات، اللي أنا كتبته بيعبر عن شعوري الحقيقي، باعبر من خلاله عن فكرة الحب المستحيل اللي بيفضل جوه البني آدم و ما بيقدرش يتغلب عليه، مش شرط إنكم تكونوا موافقين على المبدأ ده و ما تفتكروش إني كمان حابب كده و حابب اللي أنا عايش فيه و باحسه، لكن اللي يهمني أعرفه منكم هو الأسلوب و المصداقية و طريقة التعبير عن المشاعر، هل قدرت أوصل اللي جوايا و لا لأ و هل كانت الصياغة موفقة و لا لأ ؟
ثالثا: أنا كان ممكن جدا بعد كل اللي عملته أميرة فيا إني أكدب و أقول إني ما بقتش أحبها و اكتب حاجات عكس اللي جوايا خالص كنوع من الثأر للكرامة، لكني عملت هنا الشيء الأصعب على أي إنسان إنه يعمله، اعترفت بكل اللي جوايا فعلا و اللي حاسس بيه و بقيت أتحاشى إني أتعامل معاها أو أوجه لها أي كلام أو أبص لها حتى و أنا باتمنى ده.
رابعا: أنا باتصرف فعليا بشكل يحفظ لي كرامتي، زي ما كتبت في آخر حلقتين و في الخاتمة، لكن الحقيقة إن مشاعري ما اتغيرتش و مش عارف أعمل ده و عشان كده ما كدبتش و قلت على الحقيقة.
خامسا: ادعوا لي ربنا يساعدني في حياتي و في اللي جاي و يقدرني على التحمل، باحاول دايما كل ما أشوفها إني ما أضعفش و أتصرف بشكل يهينني.
