الفترة اللي فاتت كنت باطلع كل اللي باحس بيه و بيضايقني في الكتابة، جات لي فكرة السخرية من الموضوع، السخرية من شعوري و من تصرفاتي، حتى لما اتعرضت للإهانة سخرت من الفكرة و سخرت من نفسي.
ده كان بيريحني جدا، لكن السلسلة انتهت لإن فعلا الأحداث بتتعاد و ما فيش حاجة جديدة حينفع أكتبها.
لما كتبت السلسلة دي كان كل هدفي إني أخلي إنسانة خدت عني فكرة سيئة، أقولها إني مش بالشكل ده لكن اللي حصل سببه إني مش باعرف أعبر كويس عن اللي جوايا و في خلال الفترة دي كلها عملت غلطات أكتر و أكتر اتسببت في إني أذيت نفسي و وصلت للحالة اللي أنا فيها دلوقت.
حاسس حاليا بالعجز و عدم المقدرة على التصرف، حتى ما بقتش عارف أتصرف صح و لا أتصرف غلط، ما بقاش فيه أي فعل و لا أي رد فعل، بقيت متعلق في وضع واحد مش عارف أخرج منه.
أنا مفتقد السلسلة أكتر منكم، لكني لو كملتها كانت حتدور حوالين نفس المعنى و نفس اللي كتبته قبل كده، لإن ما بقاش فيه أي جديد أقدر أقوله.
