التوضيح ده أنا باكتبه، مش بهدف إني أبرر موقفي أو اللي باعمله، باعترف إن حالتي النفسية ممكن تكون بتخليني أعمل تصرفات مش سليمة قوي فعشان كده اخترت إني أطلع ده في الكتابة بتريحني شوية،
سبب إني بانشره على المدونة لإن الكتابة في المدونة بتريحني نفسيا أكتر و بصراحة كده، اتعودت إني أكتب فيها كل اللي بييجي في بالي و تفكيري و أنشره و أخلي الناس تقراه، بمعنى أصح اتعودت إن فكري كله أطلعه للناس خلاص، ما بقيتش باخليه ملك ليا لوحدي.
يمكن المشكلة الوحيدة في الفترة الأخيرة، إن كل كتاباتي بقيت منصبة على موضوع واحد اللي هو معذبني و مش عارف أخرج منه، و إن أساس المشكلة بتقرا كل اللي أنا باكتبه و ده مش منطقي و عارف إني المفروض ما أعملهوش لإنه غالبا بينزل من صورتي قدامها أكتر و بيظهر ضعفي اللي المفروض إني أخفيه، لكني طول عمري مش باعرف أكدب و لا أخبي و لا أداري اللي جوايا، لكني مش بافكر في كل ده لما باكتب، باحس بس إني عايز أخرجه بدل ما أنفجر و فعليا هو بيساعدني على الأقل إني ما اتصرفش تصرفات تهين كرامتي أكتر من كده بمعنى آخر باكتب كل اللي باحس إني عايز أعمله في الحقيقة، باكتب التوترات و الانفعالات اللي جوايا و أخرجها، و ده من الناحية النفسية، شيء صحي جدا و فعلا بيخليني أفضل.
باشكر كل الناس اللي أنا صعبان عليهم و اللي بيدعوا لي إن ربنا يخرجني من اللي أنا فيه، على أي حال مشاعركم دي معناها إني نجحت في إني أوصل لكم كل اللي باحسه و باشعر بيه و ده سمة من سمات الكاتب الناجح، الحمد لله
