كنت قلت لكم قبل كده إن عندي فكرتين لروايتين جاهزين على الكتابة، بسبب ضغط الشغل و انشغالي بإني ألاقي دار نشر محترمة لطباعة سلسلة أميرة أحلامي فما بقاش عندي وقت كافي و نفسي اتسدت بصراحة عن الكتابة، يمكن السلسلة عملت لي نجاح و حالة باتمنى أرجع لها تاني إن شاء الله لإني افتقدتها جدا، إحساس إن الناس يبقوا منتظرين نشر الحلقة الجديدة و يناقشوني في الأحداث و ناس تانيين يطلبوا مني إنهم يظهروا بشخصياتهم و أسماءهم الحقيقية،
دلوقت الفكرتين اللي عندي بدون ما أحرقهم، فكرة ساخرة لكن في خط تاني طبعا غير السلسلة لإنها حتكون قصة خيالية أو خلينا نقول شبه خيالية أو بصراحة معتمدة على الواقع يعني حاخليكم أنتوا تحكموا لما تقروها إن شاء الله
الفكرة التانية بتعتمد على الغموض و الإثارة بمعنى آخر قصة غير مفهومة بتتكشف أحداثها تدريجيا مع الأحداث، الرواية دي بقالها في دماغي أكتر من ست سنين لحد ما استقريت على كل حاجة فيها و ناقصة بس على الكتابة
اللي حابب أسألكم فيه دلوقت أنتوا كقراء تحبوا تقروا أنهي فيهم الأول ؟ و على أي حال فيه مجموعة من الأشخاص منكم اخترتهم عشان أبعت لهم فصول الروايتين زي ما كنت باعمل مع السلسلة لكن الروايتين طبعا لن يتم نشرهم للعامة حابعتهم بس بشكل خاص للمجموعة اللي اخترتهم و باثق في آراءهم
الفكرتين مجنونتين جدا ربنا يقدرني و أقدر إني أنفذهم بالشكل اللي بأمله و حيساعدني على إني أعرف ده الناس اللي وثقت فيهم و في آراءهم و كانوا أحد أسباب نجاح سلسلة أميرة أحلامي، انتظروا الفصل الأول من الرواية الساخرة بدون كشف حالي عن اسمها أو أحداثها
