عشان بعض التعليقات من بعض الناس و خصوصا البنات اللي زعلوا من خاطرة أنا كتبتها مؤخرا بعنوان "الطرق الفعالة لتجعل نفسك شخصا غير مرغوب فيه من الفتيات"
و عشان أنا ماعنديش أسرار أقلق او أخاف منها فحاوضح لكم بعض الأمور
أنا مش الشخص اللي بيعمم أبدا و لا اللي حاليا بقيت شايف كل البنات و السيدات أشرار يستحقن القتل و الحرق أحياء و لا الكلام ده، لكني نفسيا بقيت مقفول من ناحية البنات و الارتباط خلاص و بمعنى أوضح من المصريات أو العربيات، البنت المصرية أو العربية غالبا بيبصوا لوظيفة عالية، وضع اجتماعي، فلوس كتير، و لو كان معاها شهادة عالية مثلا في مجال معين فمن وجهة نظرها إن الشخص اللي حاصل على شهادة عالية برضه غير مكافئ ليها زي إن يكون معاها بكالريوس طب أو هندسة أو علوم فطبعا التجارة و الحقوق أقل منها و غير مكافئ ليها، عارف إن مش كل البنات كده بس زي ما قلت الفكر ده حيكون موجود عند أهاليهم اللي بيحطوا اعتبارات لأشياء بقت صعبة جدا توفرها جميعا في الزمن الحالي، أكيد الوظيفة في شركة أو مؤسسة حاليا بقت من أصعب الأشياء فلو الشاب شاف نوع آخر من أشكال العمل عشان يبقى له دخل يقدر يعيش بيه ما يبقاش مناسب و لا كفء
عارف إن كتير حيزعلوا من الكلام اللي حاقوله دلوقت، أنا صرفت نظر عن الارتباط بواحدة مصرية أو عربية نهائيا، لو في حالة إني قررت الارتباط حاختار واحدة أجنبية لإن الناس دول ما عندهمش العقد و لا الكلاكيع اللي عندنا و لا بيبصوا لمسألة نوع وظايف معين و لا مصادر دخل مادمت شريفة و لا مستوى تعليمي و لا غيرها من الأمور اللي المفترض إننا كمجتمع إسلامي و عربي نبص لها
جايز أكون اتعقدت بس اللي منكم قروا سلسلة "أميرة أحلامي" و بعض الكتابات التانية و عايشوا معايا بعض الظروف اللي حصلت لي سواء اللي اتوضعت فيها بمحض إرادتي أو اللي وضعوني فيها آخرين، حيعرفوا إن عندي حق في كده
و باعيد تاني و باقول عارف و متأكد إنه مش كله كده، بس أنا خلاص ما عنديش استعداد أتحط في تجارب تانية أو أتعرض للي اتعرضت له سواء من بنت أو من أهلها
