تفاصيل

اللي حتقروه ليا النهارده أو بكرة كانت المفروض حتبقى مستندة على إنسانة حقيقية كنت حاستخدم حكايتها و اسمها، استأذنتها في ده و اتكلمت معاها مرة و قالت ليا إنها حتتواصل معايا بالشأن ده عشان تقول لي التفاصيل كاملة، مع الأسف هي تجاهلت الأمر تماما و ما تواصلتش معايا حتى بإنها رافضة، صحيح إن علاقتي بيها ما تسمحليش إني أعاتبها أو أزعل و اتضايق بس أنا زعلت من الموقف اللي حصل، لإنه بيعني أشياء محددة، إما إنها قلقت من نوايايا و إما إنها شافت إن الموضوع مش بالأهمية دي أو إنها شافتني كاتب مش معروف ما يستحقش الاحترام و لا التقدير.

أنا زعلان لحد دلوقت من السيدة الفاضلة أم يحيى Naglaa Elshinawy - على الرغم برضه إن ده ما يحقليش - لأنها قرت سلسلة "أميرة أحلامي" و عجبتها و ما قالتش ليا رأيها، حتى لو ما عجبتهاش كنت حانتظر رأيها برضه، أهم حاجة بالنسبة لأي كاتب هي آراء القراء اللي بتديله دافع و حافز، حتى لو سمع قبل كده آراء عشرات أو آلاف في كتاباته حيهتم برضه يسمع رأي قارئ جديد حيكون بالنسبة له مهم و حيحسسه بالسعادة، مش مجرد يقول له حلو الله ينور، يناقشه في تفاصيل و يقول له على أجزاء معينة، يحسسه إنه قرا فعلا و عجبه اللي قراه و لو كان العكس أكيد كانت حتفيدني، لو الناس اللي كانوا بيتابعوا السلسلة من بدايتها فاكرين إني حذفت حلقة كاملة منها لإنها ما عجبتش معظم الناس و شفت إن الآراء فعلا صحيحة.

فيه برضه كتير من الناس اللي بيقروا لي و يتابعوني و مش بيهتموا يقولوا آراءهم، على الرغم من إني عارف إنهم بيقروا بس كلمات التشجيع و التقدير تفرق فعلا مع الإنسان و الكاتب، كانت هي أحد أهم أسباب نجاح السلسلة اللي كتبتها السنة اللي فاتت أكتر من إني عارف إن ناس كتير بيقروها و يتابعوها.

مافيش كاتب ابتدا مشهور، كل الكتاب بدأوا مغمورين لحد ما ربنا شاء لبعضهم إنه يوصل و يتشهر و البعض الآخر فضل زي ما هو، في النهاية ده شيء له علاقة بإرادة ربنا و اللي بيقسمه للإنسان حسب عمله و كفاحه، و أنا واحد من الناس اللي باعمل اللي عليا و الطريق لإني أبقى كاتب معروف ليه مطبوعات صعب و طويل خاصة إن شغلي واخد معظم وقتي و مش بالاقي وقت غير 4 ساعات باروح فيها المركز الرياضي، إلا في الأيام اللي الشغل بيتوقف فيها.

بالنسبة لموضوع نوايايا فأكيد مش حاقدر أثبت لأي طرف إن غرضي خير أو إن ما عنديش أي أغراض تانية لإن كل شخص بيشوف أي شخص تاني من منظوره و وجهة نظره هو.

و بالنسبة لموضوع التقدير و الاحترام فما حدش حيشتري تقدير و احترام الناس ليه و لا يجبرهم عليه.
شكرا لكل اللي بيتابع و يقرا و شكر أكتر لكل اللي بيهتم يقول لي و يعبر لي عن رأيه و أكيد برضه شكرا لكل اللي بيتجاهل و مش بيقدر لإنه بيخليني أفكر في أفكار جديدة ممكن تدفعني إني أكون كاتب أفضل.

أتمنى اللي حتقروه تقتنعوا فعلا إنه حقيقة، مش حاحرق عليكم طريقة كتابته ربنا يقدرني و تخرج بشكل ينول رضاكم و إعجابكم.