فيه بعض الحاجات اللي شفت وجوب توضيحها الخاصة بسلسلة "المهدي" و خاصة بعد نشر الحلقة الثانية "الجاثوم": رغم إني المفروض ما أقولش على الكلام ده ككاتب بس حبيت أنبهكم ليه عشان فيما بعد تبقوا تبصوا لأبعد من اللي مكتوب و تدوروا في المعاني اللي باحطها بين السطور: * بالنسبة للحوارات، زي ما عملت في "أميرة احلامي" اخترت إنها تكون بالعامية مش بالفصحى عشان أدي السلسلة واقعية أكتر و عشان كده لما حكيت عن فترة من الزمن في قرية اخترت إني أعملها بلهجة الفلاحين، يمكن اللي فيكم متابعين كتاباتي عارفين إني باحاول لما أكتب أعمل صورة كاملة بحيث إن القارئ و هو بيقرا يبقى متخيل المشهد و شايفه قدامه و لإن الفلاحين مش بيتكلموا بالعامية العادية فحاولت على قد ما أقدر محاكاة طريقتهم في الكلام، في الزمن الحالي طبعا اللهجات في الأجيال الحديثة تكاد تكون اختفت. * بالنسبة لاسم الحلقة، أنا اخترته مش بسبب إني عايز الاسم يوحي بالرعب أو إنه أكثر تشويقا، الاسم اخترته لإنه بيعبر عن مضمون الحلقة أكتر، جدي كان فيه أكتر من هم على مدار حياته "يجثم" على صدره، منها همه بتوفير حياة كريمة لأسرته رغم ظروفه الصعبة، همه بإنه ما اتعلمش في المدارس رغم رغبته في كده، همه بإنه يدخل ابنه "الأزهر" رغم صعوبة الأمر ده و تكلفته عليه، همه بإنه دخل بنته التعليم رغم إن الأمر ده ساعتها كان غير مقبول في مجتمعه بشكل كبير، همه بإنه يقرا و يتعلم و يزود ثقافته،... و قمت ربطتها بحكاية الجاثوم اللي حصلت لي فعلا في الحقيقة. * الجزء اللي حكيته عن الجنية اللي ظهرت له، رغم عدم اقتناعي الشخصي بالموضوع ده إلا إني حكيته زي ما سمعته من والدي زي ما هو سمعه منه و بازود على ده كمان جزء الخطبة اللي حطيتها على لسان الشيخ عبد الراضي، ده حصل فعلا زي ما والدي حكى لي عليه و على الرغم من إن الأسلوب اللي أتبعه غير مقبول بنسبة كبيرة إلا إنه حصل فعلا و ممكن يحسب للشيخ إنه شرح للناس أمور صعبة في الدين بألفاظ يقدروا يفهموها و يستوعبوها. * اللي بتتشابه فيه سلسلة "المهدي" مع سلسلة "أميرة أحلامي" إني فور ما باكتب الحلقة و اعمل ليها المراجعات بانشرها لكن الاختلاف إني حاليا حاطط الخط الأساسي اللي حامشي عليه و عارف بالضبط الموضوعات اللي حاتكلم فيها و الأشخاص اللي حاتكلم عنهم و الأحداث، اللي باحاول أعمله إن في كل حلقة باحط قصة بتنتهي فيها و إن الحلقة نفسها ما تاخدش من القارئ أكتر من 10 دقايق في القراءة لكن حلقات السلسلة كلها مرتبطة ببعضها و فيه حاجة باحطها في كل حلقة سيأتي تفسيرها فيما بعد، فما تستعجلوش
