يمكن تكون حاجة غريبة إني أحتفل بيها، لكن حلم إني أمتلك سلسلة تان تان كاملة كان عندي من و أنا طفل صغير، لما كان عمري تقريبا 9 سنين، دلوقت و أنا مقرب أكمل 33 سنة و النهارده تحديدا جيبت آخر عددين ناقصين في السلسلة بعد ما المطبعة أعادت طبعها من جديد، الطبعة العربية كلها بقت عندي، لكن ده بيخليني أسأل عن بقية أحلامي اللي باتمناها هل حتتحقق بعد مدة برضه ؟ يعني اللي كنت باتمناه و أنا عمري 22 سنة حيتحقق و أنا في الخمسين مثلا ؟! مش عارف هل ساعتها فرحتي حتكون زي ما كنت باتمناها و أنا في العمر ده و لا حتكون أقل !
أكيد فرحتي بسلسلة تان تان كانت حتبقى أكتر و أنا طفل صغير كان نفسه يبقى عنده المجموعة كلها، حاليا مش حاسس بفرحة بالمعنى المفهوم، أقدر أقول بس إني مبسوط على خفيف، لكن شعوري ده ما منعنيش إني أحقق حاجة كنت باحلم بيها، حتى لو كانت الفرحة أقل فالحلم لازم يتحقق ما دمت عندي القدرة إني أحققه.
