النهارده كان عندي مقابلة شغل في مدرسة خاصة، كان من ضمن السعي اللي باسعى ليه إني أشتغل مدرس حاسب آلي، رغم إنه مش حاجة قوية لكني قلت أطرق كل الأبواب رحت هناك فضلت قاعد أكتر من ساعتين منتظر على بال ما حد عبرني، إدوني أملا استمارة بيانات، مليتها فعلا و انتظرت مدة تانية
سيدة وصلتني لمكتب و قالت لي إن المقابلة حتكون بالإنجليزي فقلت لها عارف و ما عنديش مشاكل في كده لحد ما خلوني أقابل إنسان أقل كلام أقدر أقوله عنه إنه وقح و مش متربي و عنده عقدة نقص أول شيء لما دخلت المكتب كان بيتكلم في التليفون، و شاور لي بأسلوب فظ عشان أقعد، رحت بامد إيدي أسلم عليه ما مدش إيده، قلت إنه ممكن يكون ما أخدش باله لإنه ما كانش باصص لي أصلا بعد ما خلص مكالمة، برضه ما بصش عليا و قال لي فين السيرة الذاتية ؟ رديت و قلت مش جايبها، لإن اللي بلغني بالوظيفة ما كانش قال لي على إني أجيبها، فابتسم بأسلوب وقح و ما ردش، مع إني كنت مبلغهم في الإدارة إني مش جايبها معايا و المفروض الاستمارة حطيت فيها كل اللي كان مكتوب فعليا في السيرة الذاتية و أكتر كمان (كل ده و مش هاين عليه يرفع عينه و لا يبص لي و بيتكلم بأسلوب زعيق و فيه عدم احترام، حتى لو شخص مقدم على إنه يشتغل خدام مش حيتكلم معاه كده) قال لي متخرج من إيه فقلت له، سألني سؤال تاني بصوت غريب كإنه بيهمهم أو يتمتم ما فهمتوش، فقال لي بزعيق: إيه البرامج اللي بتشتغل عليها، فقلت له على كذا حاجة فزعق بصوت أكبر و سألني على برامج برمجية. فقلت له: لأ و لسه حاكمل و أقوله إنها ما لهاش علاقة لا بمجال دراستي و لا الوظيفة اللي حاقدم فيها أصلا، بص لي بطرف عينه و زم شفته: و قال لي: "شرفت" قمت من مكاني بعد ما دمي كله اتحرق، و ما ردتش عليه؛ لإني مع الأسف مش متعود إني أهين حد، لكن السؤال اللي باسأله لنفسي هنا: أصحاب و مدراء العمل بيتعاملوا مع الشباب حاليا كإنهم بيشحتوا منهم، حتى لو حد بيشحت المفروض ما يكونش الأسلوب بالشكل ده الوظيفة مرتبها ما كانش عالي و ما كنتش حاعمل فيها حاجة تقريبا غير إني أشغل ألعاب للتلاميذ يلعبوها أو أخلي بالي من المعمل، كل ده و بعد اللي درسته و أعرفه و أقبل بحاجة زي كده و ييجي إنسان بالوقاحة و السفالة دي يتكلم معايا بالأسلوب ده، حسيت قد إيه إني بني آدم بلده رخصته و خليته ما لوش قيمة و إني آجي و أنا منتمي لعائلة معروفة ليها اسمها و سمعتها و أب و أم كانوا في وظايف عالية و بيحوزوا احترام الجميع، شخص زي ده يتعامل معايا بأسلوب كده لمجرد إني مش عارف ألاقي واسطة آخد بيها حق حد تاني زي ما كتير بيعملوا أنا كتبت الكلام ده لإن دمي لسه محروق لحد دلوقت و أعصابي بايظة و مش عارف حاعمل إيه في حياتي، سايبها على ربنا، لكن كل الناس بقوا بالشكل ده و واضح إن ما فيش أمل مع الأسف في بلد زي دي و عايز أعرفكم إحنا وصلنا لقد إيه من إهانة متعمدة للإنسان حسبي الله و نعم الوكيل
