ريزو هو المركز الرياضي اللي باروحه بقالي مدة، أفتكر حوال 3 سنين لحد دلوقت، بصراحة مش باعد 😃، في المدة دي حياتي تكاد تكون اتقفلت عليه، لإن شغلي في الفترة دي كله من الإنترنت، فما كانش عندي وقت أروح أي مكان تاني، أنا هدفي الأساسي منه هو الرياضة، و فعليا حياتي الصحية و النفسية اتأثرت جدا من خلال ممارستي لنوعيات الرياضة المتخصصة اللي المكان يعتبر أفضل من يقدمها في إسكندرية كلها من ناحية المدربين المتخصصين اللي بيتعامل معاهم و من ناحية تكلفة السعر (و لو إنهم كل شوية يعلوا السعر 😂).
أنا قابلت هناك نوعيات من الناس ما اتعاملتش معاهم قبل كده، ما ينفعش أقول إن فيهم الكويس و فيهم الوحش لإني مش بانتقد الناس بالشكل ده، بس أكتر حاجة بتميز معظم الناس هناك إنهم مش مزيفين؛ بمعنى إن ما فيش حد بيدّعي شيء هو مش عليه لمجرد إن فكر المجتمع رافض ده، الأهم من كده كمان إن ما حدش بينتقد طريقة أو حياة حد بالسلب، يعني بالنسبة لي أنا مثلا، ما فيش حد قال لي بدهشة أنت بتهتم تصلي ليه ؟ أو لما الآذان بيأذن بتردده ليه ؟ أو فك نفسك شوية أو الكلام ده، باشوفه نموذج لمصداقية مجتمع بغض النظر عن قبولي الشخصي لبعض الأفكار اللي باشوفها أو عدم قبولها.
ممكن اللي بتقروه حاليا في "المهدي" يوحي لكم إن أنا عقدت صداقات مع ناس كتير هناك، ده مش حقيقي و إن كان ده شيء يسعدني لو حصل، غالبية الناس اللي هناك علاقاتي معاهم جيدة الحمد لله، فيه ناس منهم صحيح حصلت تصرفات معينة خلتني ما بقيتش أتعامل معاهم زي الأول، سواء كان بالتجاهل لما أشوفهم أو مجرد سلام عادي، و أكيد ده بيضايقني و بيحزنني، (و الله العظيم مش قصدي أميرة باقصد ناس تانيين من علاقاتي الاجتماعية هناك)، لكن على الجانب الآخر فيه ناس علاقاتي زادت معاهم و بقت أفضل.
مش باكتب الكلام ده لمجرد الإشادة بالمكان اللي كان السبب في إني أكتب رواية و جزء من رواية لسه باكملها لحد دلوقت و ساهم في نجاحي المحدود - حتى الآن - ككاتب، لكن باكتبه أكتر عشان أقول لأي حد إن تعاملك مع مجتمع ممكن يكون فيه كتير من الأفكار أو التصرفات أنت نفسك مش بتعملها، مش معناه إنه يأثر عليك أو على تفكيرك أو يغيّر من فكرك و مبادئك اللي أنت مقتنع بيهم و اخترتهم لنفسك؛ لإن لو ده حصل لك فثق تماما إن المشكلة عندك أنت مش في المجتمع اللي بتتعامل معاه؛ لإن ربنا لما خلقنا خلقنا كلنا مختلفين في العقائد و الأفكار و الرؤى و التصرفات و غيرها و طلب مننا إننا نتعامل و نتعايش مع بعض و إن كل شخص يحاول يفكر و يتدبر في اختيار إيمانه و النهج اللي عقله أقنعه بيه، و في النهاية حسابه على ربنا مش على الإنسان اللي ما يفرقش عنه في حاجة.
أتمنى أكيد إن حياتي تبقى متشعبة أكتر و أبقى باتعامل مع أماكن أخرى و مجتمعات تانية، لإن حياتي في ريزو مش بتزيد عن 3 ساعات في اليوم و ده أيا كان مش كافي إنها تبقى حياة لإنسان، لكن لحد ما ربنا يأذن بده، أقدر أقول إن المكان ده هو حاليا السبب في إني متحمل ظروف كتير من اللي عايشها و لولاه كان زماني غرقت في دوامات من الاكتئاب و التعب زي ما حصل لي قبل كده فعلا.
أي حد بينتمي للمكان ده أو بيروحه - سواء علاقتي بيه محدودة أو جيدة أو انتهت -، باوجه له الشكر و التقدير، لإنه ساهم في إن حياة واحد اسمه أحمد تبقى أحسن و أفضل.
