أنا شفت من قريب مسلسل ونوس، المسلسل حلو فعلا و مختلف، عندي ملاحظات عليه إيجابية و سلبية: * العمل مقتبس صحيح و سبق و قدمه يوسف وهبي في فيلمه الشهير سفير جهنم، بس المعالجة و الأحداث مختلفين، حتى أداء الممثلين نفسه. * عجبني جدا إنهم خرجوا بره شخصية إن الشيطان ما ينفعش يكون في أماكن عبادة أو لما يتم ذكر ربنا أو آيات قرآنية يتحرق، لإن ده طبعا مخالف للواقع بدليل الآيات القرآنية و الأحاديث النبوية اللي بتجيب كتير جدا على لسان إبليس و ذريته ذكر ربنا و الحديث عن أشياء في العقيدة. * يحيى الفخراني أدى شخصية الشيطان بشكل بارع ما اتقدمتش كتير سواء عندنا أو بره، و أنا باتفرج حبيت الشخصية و يحيى الفخراني أدى بالذات المشهد الأخير ببراعة اللي بيلوم فيه ربنا إنه غفر لياقوت اللي ارتكب غلطات كتير و ما غفرش ليه هو غلطة واحدة عملها. * نبيل الحلفاوي رغم إنه ممثل بارع، بس ما حسيتوش قوي في الشخصية كنت أتمنى حد تاني يقوم بيها، مش عارف ليه، ممكن يكون أحساسي ده غلط. * هالة صدقي فاجأتني في العمل ده، أدت الدور ببراعة، لكنها ما أقنعتنيش إنها مسلمة في كتير من المشاهد، يعني حسيت إنها بتمثل و بتتجنب قول بعض الأشياء الإسلامية و بتتحايل عليها، زي المشهد اللي كانوا بيتفرجوا فيه على ابنهم الشيخ في التليفزيون و ذكر اسم النبي، فالأسرة بطبيعة الحال قالت "عليه الصلاة و السلام"، هي غمغمت بكلمات ما لهاش علاقة و ده ظهر جدا. * نيقولا معوض، أنا ما شفتوش قبل كده و اتفاجئت بأدائه المتقن رغم إنه في بعض الأحيان كانت لكنته بتخونه، لكن شخصيته صعبة و هو عرف يأديها ببراعة. * حنان مطاوع في بعض الأحيان كنت باحسها بتأدي بشكل معقول و في أحيان تانية كنت باحس بإنها متكلفة. بالنسبة للسلبيات: * المسلسل مليان مشاهد خارجة - إلى حد ما - مش مناسبة لرمضان نهائيا و لا لطبيعة العمل نفسه، زي لبس نهى عابدين، و مشهد لمحمد شاهين في سيارة و مشاهد شرب الخمور و الرقصات و غيرها. * المسلسل اتفاجئت إنه عامل بشكل فاضح جدا إعلانات لبيرة استيلا ! يعني في رمضان و عمل له مغزى ديني و يتعمل إعلانات لكحوليات و على مدار العمل ككل !
