فيه إنسانة كانت في يوم من الأيام عزيزة عليا جدا و باعتبرها زي والدتي، اتغيرت من ناحيتي 180 درجة، الله أعلم إيه السبب؛ يمكن تكون حست بالزهق أو بالملل أو سمعت لبعض الناس اللي اتكلموا عني بشكل مش كويس و صدقتهم، الله أعلم
بدون ما أدخل في أي تفاصيل، و أنا مش عارف إذا كانت لسه بتتابعني و حتقرا الكلام ده و لا لأ، لكن هي قالت رأي بيوضح إني كاتب فاشل و ما حدش بيقرا لي لإن نسبة التفاعل معايا ضعيفة
التفاعل ضعيف لإن أنا مش مسوق لنفسي لسه، و زي ما حضرتك شايفة في الصورة دول عدد الأصدقاء اللي عندي بس و بعمل نسبة بسيطة لو كان مثلا عدد الأصدقاء عند حضرتك 5000 فحتلاقي نسبة التفاعل مقاربة لنسبة التفاعل اللي عندي في صفحتي بالإضافة إني مش باحط عندي في الأصدقاء غير الناس اللي أنا باتفاعل و باتواصل معاهم، و فيه واحد أو اتنين كده عندي مجاملة فقط، و باشيل بين الوقت و التاني بعض منهم
أنا كنت حانشر فعلا من حوالي ستة شهور و حاعمل حملة تسويقية لنفسي ككاتب؛ لكني اتنصب عليا في شغل كنت فيه لمدة أربعة شهور و ما أخدتش فيه و لا مليم، و قعدت فترة من غير شغل خالص و كان الدخل اللي بيجيلي يا دوب مكفي احتياجاتي الأساسية عشان كده ما كانش معايا فلوس أعمل حملة و لا أطبع كتاب، يمكن لسه ربنا رايد إن الشغل ما يبقاش مضبوط قوي عندي حاليا، لكن على الأقل قدرت أثبت نفسي في شغلي الحالي الحمد لله و باحاول أشوف شغل تاني
و اللي حصل ده بالإضافة لبعض الحاجات التانية خلاني أنعزل عن الناس بشكل شبه كامل و ما كنتش باعمل فيه غير حاجات بسيطة جدا، و لسه راجع من فترة قليلة للتواصل مرة تانية على بسيط، و كنت باتمنى إن علاقتي الطيبة بيكي ترجع زي الأول لكني لاقيت منك نفس التعامل
جزئية إن الناس مش بتقرا لي أو بطلت تقرا؛ فدي مش حقيقة، أنا لسه بانشر لعدد محدود جدا من الناس و متعمد ده قبل ما أنشر على نطاق أوسع عشان أبقى عارف ردود الأفعال و أقدر في نفس الوقت أغير بعض الحاجات و أستفيد من الآراء، لكن اللي بيقروا لي شايفين إني باعرف أكتب، و بيحبوا اللي بيقروه و شايفين كمان إني جدير أبقى كاتب معروف، و ما أنكرش إني شايف نفسي كده من غير غرور، لإن أي شخص لو ما كانش عنده ثقة في موهبته و في اللي بيعمله مش حيعمله أصلا و لا حيكون متميز فيه
على أي حال، أي إنسان مش حيثير إعجاب الجميع، لازم فيه اللي حيحب و اللي حيكره و اللي حيبقى بالنسبة له عادي، اللي مضايقني بس إنك ما كنتيش كده في الأول و لا ده كان رأيك، لكن قدر الله و ما شاء فعل، طبيعي إننا نكسب ناس و نخسر ناس
