ردا على بعض الناس اللي قالوا لي على نصايحهم في موضوع الارتباط؛ أنا عارف إن الزواج نفسه رزق و ربنا بيرزق بيه،
و إني مادمت باجتهد و باسعى أكيد ربنا حيوفقني و إن تأخيره في تحقيق أحلام كتير باحلم بيها، و ناس باخسر علاقتي بيهم، و آراء و أفكار كتير بتتغير جوايا، هي لحكمة هو - سبحانه و تعالى - يعلمها
لكن حافكر معاكم بصوت عالي - اعتبروني باصوت يعني - فيه نصيحة بتجيني إني أرضى بخطوبة أو قراية فاتحة حتى لو واحدة مش مستريح ليها؛ أولا أنا ما ارضاش لواحدة أنا عارف كويس إني مش حاتقبلها أحطها في الموقف ده و أعشمها بشيء لمجرد إني يتقال عني إني خطبت و بعد كده أفسخ الخطوبة و أكيد ده حيكسر قلبها
ثانيا أنا كتركيبة على الرغم من إن ناس كتير ممكن يشوفوني شخص منغلق و إن الأفضل ليا هو الزواج التقليدي، ده مش بينفع معايا نهائيا، أنا صحيح فيه حاجات كتير مش بارضى بيها زي إني أمشي مع واحدة أو أصاحب أو أخرج أو أعرف واحدة من ورا أهلها، لكني في نفس الوقت مش حينفع أتجوز واحدة لمجرد الجواز بس، و إلا كنت عملتها من زمان، و ما استنيتش لحد ما أوصل للسن ده، أنا محتاج أحس إني باحب و أتحب، بإن الإنسانة دي ما أختارتنيش لمجرد إني من عائلة معروفة أو إن عندي شقة و أقدر أفتح بيت، عايز واحدة تكون عايزة أحمد مجرد من كل شيء؛ من اسم عائلته، من وضع عائلته، عايزاه بكل الصفات السيئة اللي فيه قبل صفاته الحسنة، و لازم أكون أنا كمان حاسس بنفس الشيء ناحيتها
باشكر كل الناس اللي بيحاولوا يساعدوا - و يوفقوا راسين في الحلال - و لو إني مش باحب اللفظ ده لإنه بيفكرني بالتور و البهيمة، يا ريت لو تسيبوني أنا أفضل أحاول و أغلط عشان أوفق قلبين في الحلال؛ قلبي و قلب واحدة لسه مش عارف هي مين و إن كانت حتيجي في يوم من الأيام و لا لأ
