كنت منتظر إن كل الناس اللي المفترض يقروا الحلقة الأخيرة "دخلة الجعفري" يقروها و يقولوا آراءهم قبل ما أكتب لكم الكلام ده، لكن عشان اتأخروا و ما اعرفش هل التأخير ده بسبب إن حد فيهم زعل من الحلقة أو حاجة فيها و لا مشغوليات، لكن على أي حال، اللي حابب أقوله إن ردود أفعالكم أسعدتني جدا و شرفتني، أعداد كبيرة جدا من الناس - منهم ناس ما اعرفهمش شخصيا - قروا الحلقة دي بس من غير ما يقروا بقية حلقات رواية " المهدي" بجزئيها "أميرة أحلامي" و "أينما أسير".
بغض النظر إنه كان يهمني أعرف الآراء كاملة في الرواية قبل إقدامي على الخطوة القادمة من أكبر عدد من الناس، لكن اللي سمعته و قريته منكم كلكم أسعدني و شرفني، و منه كلام كتير هون عليا اللي قاسيته و عانيت منه الفترة اللي فاتت، و يمكن درس اتعلمته و باحاول أقولكم عليه؛ لو حد مر بتجارب مؤلمة في حياته، بدل ما يخليها تدمره و تحبطه، يوظفها في عمل إبداعي يعرضه على الآخرين، النجاح في شيء المفترض إنه يؤدي إلى الفشل بيكون له معنى أفضل و أحسن.
أسلوب السخرية المريرة أو زي ما منكم عارفينها بمصطلحها الإنجليزي Black Comedy من أصعب الأساليب في الكتابة و التعبير، و أأمل و أرجو إن ربنا يكون وفقني فيها.
فيه كذا حد علق على جزئية إني معنون الحلقة "للبالغين فقط + 21" مع إن ما فيهاش ألفاظ بذيئة و لا إيحاءات جنسية، و بافتخر بإني قدرت أناقش مواضيع حساسة زي اللي موجودة في الحلقة من غير ما أخدش حياء حد أو أخلي حد يخجل إنه يخلي خطيبته أو زوجته أو أخته تقراها؛ زي ما قلت قبل كده عبارة "للكبار فقط" أو "للبالغين فقط" مش معناها ألفاظ و إيحاءات، معناها إن المواضيع اللي فيها صعب فهمها لمن هم أقل من المرحلة العمرية دي.
ناس سألوني لو كان فيه جزء ثالث، أنا قفلت الرواية فعليا خالص و حليت من خلال آخر حلقة كل الألغاز و الأفكار اللي كانت مبهمة في الحلقات السابقة، لكني مادمت عايش و موجود في الحياة فاحتمالية وجود أجزاء أخرى أكيد وارد، و لو حسيت إني حاضيف للرواية و مش حانقص منها و إني محتاج فعلا أكتب، حاعمل جزء ثالث إن شاء الله.
الخطوة الحالية اللي حاعملها إني ححاول أسوق نفسي ككاتب على نطاق أوسع خاصة إني حاليا عندي رواية كاملة متكاملة، و أنا فعليا باكتب في مجالات متعددة من مدة، و بانشر في مواقع أخرى غير مدونتي الشخصية، لكني عايز أشوف حلول إن معظم الناس مش بيقروا غير "المهدي" بس، طبعا منها إني ذاكركم فيها بشخصياتكم، و ده في حد ذاته أثار فضولكم إنكم عايزين تعرفوا كاتب عنكم إيه، غير كده مع الأسف مش بتقروا 😞
شكرا أكتر من مرة لكل اللي قرا أيا كان السبب اللي قرا عشانه، و لكل اللي اهتم يعلق و ينصح و يشجع و ينتقد، ربنا يقدرني و أكون في الوضع اللي باتمناه لنفسي، و ساعتها آدي دقني لو حد فيكم عارف يوصل لي 🤣🤣
