لما فكرت في اللي حصل لي السنة دي، لقيت نفسي مركز على الأشياء السيئة لإنها كانت الغالبة، لكن لما فكرت تاني لقيت بعض الحاجات الإيجابية، صحيح مش كتير لكنها تذكر، أنا انتظمت أكتر في الرياضة، من الناحية الجسمانية بقيت أفضل و الحمد لله، اتعلمت أعتمد على نفسي في حاجات كتير
كنت اللي باحاول أعمله إني ما بقاش معتمد أو محتاج لحاجة من حد، لكن ربنا شاء إن ده ما يحصلش و يمكن دي حكمة منه إني أكون عارف إن الإنسان دايما لازم يكون في حياته وجود للآخرين، اللي اتعلمته من اللي حصل لي خلال السنة دي إني ما اتصدمش في حد أو أبقى منتظر دايما إنه يعمل لي شيء أو إنه يتغير من ناحيتي لأسباب غير معروفة، بقيت مش بامنع نفسي إني أتعرف على ناس جداد، لكن في نفس الوقت بابقى متوقع و منتظر إن علاقتي بيهم حتنتهي في يوم من الأيام
عشان أعيش حياتي من غير صدمات بقيت باتوقع الأسوأ دايما، و على الرغم من إنه شيء قاسي، لكنه هو اللي مطلوب مني مع الأسف
شكرا لكل حد كان في حياتي، و شكرا لكل اللي دخلها و شكرا لكل اللي خرج منها و شكرا لكل اللي حيخرج منها و شكرا لنفسي إنها قادرة تستحمل معايا كل ده، شكرا ليا إني لسه عايش و باحلم و بافشل و باحقق
