السلام عليكم فيه حاجة حابب أقولها لبعض الناس اللي بينشروا وظايف و للباحثين عن عمل عشان ينتبهوا موضوع مكاتب التوظيف بقت كتيرة جدا و مع الأسف فيه منها - مش حاقول كلها عشان التعميم - بيكتبوا الوظيفة بشكل مغاير لحقيقتها عشان الناس يروحوا و يقدموا، و ده طبعا لإنهم بياخدوا من أي حد يقدم رسوم تقديم
حصلت معايا الأسبوع ده، كانت وظيفة منشورة و معروض فيها مرتب خيالي، و لما حاولت أتواصل مع الرقم اللي كان منشور مع الوظيفة، كان الرد إن التفاصيل في المقابلة، و لإن كان عندي أمل و شغلي الحالي بسيط جدا و محتاج وظيفة؛ فسافرت القاهرة مخصوص، و لما رحت هناك طلبوا رسوم 30 جنيه، و طبعا لإني فعليا أخدت مشوار طويل دفعت فيه أكبر من المبلغ ده، اضطريت إني أدفعه، لما دخلت للشخص اللي حيجري معايا المقابلة - اللي مش فاهم ليه بيطلقوا عليه MR فلان، مع إننا مش في أمريكا و لا بريطانيا و لا لغتنا الرئيسية هي الإنجليزية - لقيته شاب أصغر مني بكتير - غالبا ابن صاحب الشركة - و بعد ما طلب مني إني أعرف نفسي، قال إن الوظيفة حتبقى يومين في الأسبوع فقط و يوميتها كذا، و ده طبعا ما يجيش عشر المبلغ اللي هما كانوا معلنين عنه؛ و اللي حيخلي فيه استحالة إني أنقل إقامتي للقاهرة عشانه أو إني طبعا أسافر اليومين دول لإني حادفع في المواصلات نص المبلغ المعروض تقريبا يا ريت بس أي حد بينشر وظيفة، - مش قصدي طبعا الناس اللي كتر خيرهم بيشوفوا إعلانات وظايف و بيعرضوها عشان يساعدوا الناس - يتقي الله لإننا مش ناقصين نصب و إحباطات، كفاية اللي إحنا فيه، إنك تسترزق على آمال الناس و أحلامهم و تستغلها، أفتكر إن ده عقابه عند الله حيكون شديد و لأي حد باقوله، لو إعلان شبيه بكده، لقيت إن الشخص اللي المفترض تتواصل معاه بشأن الوظيفة ما رضيش يقولك معلومات كافية، فمع الأسف غالبا الموضوع حيكون نصب، بس برضه يا ريت تنتبه للناس اللي بينشروا الوظيفة فقط و ما عندهمش أي معلومات، و أتمنى منعا للبس إنهم يوضحوا ده، بكتابة عبارة زي "إعلان منقول و ليس لدي معلومات برجاء التواصل مع الوسائل المذكورة".
