إزيكم يا شباب و يا بنات و يا سيدات عارف إن كتير منكم أو بعضكم أو ما فيش حد خالص 😂 مستني "جمهورية الأحيه" و عارف إني كالعادة اتأخرت في كتابتها
أنا باعترف إن حالتي النفسية بتأثر على مقدرتي على الكتابة، أنا باكتب بالعافية المقالات و الأخبار الخاصة بالشغل، و مقال البيلاتس اللي فيه منكم قروه، مش عارف و الله كتبته إزاي، الحمد لله إنه قدرني يمكن الحاجة اللي تشفع لي في التأخر في الكتابة و النشر إني لما بانشر، الحمد لله اللي بتقروه بيلاقي إعجابكم و باقرا و باسمع منك تعليقات بتسعدني، و عشان كده أنا مش باحب و لا باعرف أكتب غير لما باكون قادر على ده و مش بانشر العمل إلا و أنا مقتنع بيه و حابه؛ عشان كده برضه الضغوطات و الصعوبات و المشاكل بتخليني مش عارف أجمع الأفكار أو أصيغها بالشكل اللي يرضيني فيه حاجات كتير باكتبها - زي أي كاتب - لما باقراها كقارئ مش بتعجبني و ده بيخليني يا إما بامسحها خالص يا إما باعدل عليها، ربنا يمكن منعم عليا بنعمة إني باقدر أحكم على نفسي كقارئ عادي، بغض النظر طبعا عن إن ممكن فيه من القراء اللي يقرا و ما يعجبوش اللي قراه لإن المسألة في النهاية أذواق و مش كل شخص حتعجبه كل حاجة، لكني في النهاية باكتب اللي أنا حاسه، و أكتر شيء بيهمني إن اللي يقرا يوصله الإحساس ده، و الحمد لله كل التعليقات اللي بتجي لي، بتأكد لي إني نجحت في ده الكاتبة و الأديبة و الصديقة العزيزة ريم أبو الفضل، كتبت لي تعليق على "دخلة الجعفري" من ضمنه اقتراح معين، أنا فعليا حاضعه موضع التنفيذ مع دمجه باقتراح آخر من أختي العزيزة شيماء، و تطويري و رؤيتي الشخصية ليهم باشكرهم جدا و باشكر الناس اللي مش بتكتفي فقط بإنها تقول حلو أو جميل، و بتدي تعليقات بتثبت إنها حبت العمل و عايزاني أكون أفضل و أطور من نفسي، ربنا يقدرني على ده و أكون عند حسن ظنكم
