أكتر حاجة شاغلة الناس حاليا هي تولي السيسي فترة حكم تانية، و بيقولوا إن الخراب و الدمار حيصيب البلد أكتر بغض النظر عن جزئية استحقاقه للمنصب أو لأ، بس بعد كل اللي حصل في حياتنا كمصريين، لسه مازلتم شايفين إن المشكلة في الحاكم ؟!
ربنا قال: "إن الله لا يغير ما بقوم حتى يغيروا ما بأنفسهم" بعد كذا رئيس مسك و بعد كذا حاجة شفناها و عيشناها، كررنا نفس الطريقة و الأسلوب في تأليه الحكم و التطبيل ليه و عدم اعتباره إنه موظف بيقبض فلوس عشان خاطر يشوف شغله على أكمل وجه و إن أي شيء بيحصل هو اللي بيتحمل مسؤوليته قدام ربنا و قدام الناس موضوع الاستمارات و موضوع التأييد ليه، بدون كدب إحنا كلنا عارفين إن فيه ناس كتير جدا بيأيدوه و شايفينه إنه الأصلح و إنه بيعمل اللي عليه - طبعا أغلبهم من كبار السن - فسواء كان فيه مبالغة في عدد الاستمارات أو كانت صحيحة ففيه ناس فعلا مضوا عليها و ناس فعلا عايزينه يكمل بأي عين عايزين إن ربنا يغير اللي إحنا فيه، و أنتم نفسكم مش عايزين تتغيروا ؟! عارفين إيه أكبر مشكلة ؟ يا ريتها جت عليكم أنتوا بس، لكن كلنا عايشين مع بعض في نفس المكان، و كلنا بندفع نفس التمن اللي أنتوا السبب فيه حسبي الله و نعم الوكيل في كل حد كان سبب في اللي بيحصل و اللي حيحصل ما ليش غير الدعاء المذكور في سورة النساء: "رَبَّنَا أَخْرِجْنَا مِنْ هَٰذِهِ الْقَرْيَةِ الظَّالِمِ أَهْلُهَا وَاجْعَل لَّنَا مِن لَّدُنكَ وَلِيًّا وَاجْعَل لَّنَا مِن لَّدُنكَ نَصِيرًا"
