مش المنتهى إنك تنشر كتاب أو يبقى اسمك مطبوع على عمل ما؛ ممكن جدا تقدر تحقق ده و يكون في النهاية بدون أي فايدة و لا قيمة؛ ممكن يرجع لإنك حاكيت أسلوب كاتب معين، أو كتبت شيء، غيرك سبقك ليه أو إنك ما قدرتش بعملك توصل للناس و تخليهم يقروا لك، أكيد مش حتقدر توصل للجميع؛ فيه اللي حيحبك و اللي مش حيحبك و فيه اللي مش حتفرق معاه في أي شيء، لكن لو قدرت توصل إنك تخلي عدد و لو حتى قليل يهتم بمتابعتك و قراءة اللي بتكتبه باستمرار؛ يبقى أنت حققت نجاح فعلا
حاول تتميز و تعمل موازنة ما بين اللي حابب تكتبه و بين اللي الناس بيحبوه، جرب و افشل و في الآخر أكيد حتنجح
الكلام ده باقوله لنفسي دايما، في وسط إحباطات كتير و قبل ما ابتدي أروج لنفسي و أخلي أعداد أكبر يقروا لي، كنت مهتم بإني أعرف آراء مجموعة أثق في آراءهم و استفيد منهم
شكرا لكل اللي دعمني و لكل اللي اتخلى عني أو غيّر رأيه فيا بدون سبب منطقي، كل واحد فيكم اتعلمت منه، و لو فرضا قدرت أوصل و أحقق اللي محتاج له؛ حافضل فاكر الفترة دي من حياتي؛ فترة النجاح المحدود في وسط أعداد قليلة من القراء، فترة الفشل في إني أخلي ناس يقروا لي و النجاح إني أخلي ناس آخرين يقروا لي، حافضل فاكر إني مش حاحقق أبدا في حياتي نجاح كامل و لا فشل كامل؛ لازم حيكون فيه جزء من ده و جزء من ده، لكن أتمنى إن جزء النجاح يكون أكبر و إن الفشل يكون لا شيء لا يُذكر
