فيه كتير من الناس نصحوني إني ما اكتبش عن اللي حتقروه ده، لكني كتبته لهدف حتعرفوه لما تكملوا قراية يمكن اللي حصل لي من ساعة ما اتخرجت في موضوع الشغل و الوظايف خلاني ما ابقاش مطمن و قلقان لما بانجح في الحصول على وظيفة
أنا بقالي مدة و الحمد لله، مضيت عقد شغل رسمي المرة دي في شركة، باشتغل فيها كإداري في قسم الموارد البشرية، طبعا بسبب عوامل كتير مش عارف إذا كنت حاكمل فيها و لا لأ، لكن يمكن المرة دي عشان الموضوع مختلف (من ناحية العقد و من ناحية طبيعة الشغل) عن الوظايف السابقة مخليني حاسس إني إلى حد كبير بدأت فعليا في شغل أكسبني و بيكسبني خبرات في حاجات كتير جدا
اللي خلاني كتبت ده هي فكرة إحساسي الدائم بالإهانة اللي كان بيلاحقني في بعض تعليقات الناس و اللي كنت باشوفه على وجوههم لما باقول إني باشتغل في شغل حر، لكل حد من دول باقول إن الموضوع ده مش بإيدي و لا بإيد أي حد غير ربنا، هو اللي بيكتب للإنسان على حسب سعيه و اجتهاده، أكيد أنا سعيي كان أقل من ناس آخرين، لكنه كان كافي بالنسبة لشخصيتي و لعوامل تربيتي و نشأتي و فيه منكم اللي عايش كتير من فترات حياتي و شاف اللي باعاني منه و اللي كنت باعمله على قد ما باقدر اللي باطلبه من كل حد حيقرا الكلام ده، سواء كانت علاقتي بيه مستمرة أو انقطعت أو كلامي معاه ما بقاش زي الأول، إنه يدعي لي بالتوفيق في اللي باعمله، و إنه يكتب لي الصالح، كل شخص بيدعي لإنسان في حاجة لدعم أو مساعدة أو مجرد كلمة حلوة، أكيد ربنا بيردها له و يا عالم إيه اللي ربنا بكرة مخبيه
(أنتوا عرفتوا دلوقت ليه مش عارف أكمل خاتمة المهدي بقالي مدة، الحياة الجديدة مع الشغلين و شغل البيت مش سهلة و محتاجة تعود ربنا يقدرني 😂😂) أخيرا ادعوا لي إن ربنا يزقني بإنسانة أكون واثق إنها حتبص عليا كأحمد مجرد مش كشخص ابن ناس محترمين و بيشتغل و خلاص؛ لإن الجزئية دي مش عارف حاتأكد منها إزاي، و إن ما كانش حيكتب لي الاستمرار في الوظيفة دي، يكتب لي حاجة أحسن من عنده السعي و الاجتهاد مع الدعاء مطلوبين، ربنا يكتب لنا كلنا الخير و السعادة ❤️❤️
