إزيكم يا شباب و يا بنات و يا سيدات يا رب تكونوا بخير عارف إن معظم الناس اتخنقوا و زهقوا من موضوع رواية "المهدي" و التعديلات اللي أنا مش مخلصها لحد دلوقت، و إن غالبية الناس اللي كانوا بيقروا و مهتمين بالمتابعة بقالهم مدة بطلوا يقروا أو يعلقوا على أي شيء له علاقة بالكتابات اللي باكتبها
لكن قدروا موقفي؛ فيه ميزة و عيب للي حصل الميزة إني أخدت أراءكم و استفدت بحاجات كتير جدا قبل تحويل العمل لرواية لإن العمل بصورته الأولى ما كانش ينفع ينشر كرواية مطبوعة حتى مع موافقة بعض دور النشر عليه، هو كان أشبه بمواقف و خواطر كنت باكتبها زي ما بتيجي في دماغي العيب بقى إني حرقت بعض تفاصيل العمل على بعض الناس، صحيح أعداد اللي قروا مش كتير، بس ده خلاني عشان العمل تتم قرايته لما ينزل كرواية، أحول فيه حاجات كتير جدا، لدرجة إن الفكرة الرئيسية للجزئين "أميرة أحلامي" و "أينما أسير" اتغيرت خالص و بقت حاجة جديدة فيه حاجات تمت إضافتها و حاجات تانية اتحذفت و لسه مستمر في ده، لكن معظم اللي قريتوه أنا باستخدمه فمش باعيد كتابة العمل من الألف للياء الفكرة الجديدة صعبة جدا و مرهقة و خاصة إني حاليا بامر بظروف صعبة في حياتي، حاولت أوظف ده في الكتابة مع المحافظة على روح السخرية المريرة اللي كانت موجودة و عجبتكم شكرا لكل اللي علق برأي أو اهتم بالقراية أو حتى بطل يقرا، كلكم استفدت منكم و لما ربنا يشاء و العمل يخرج للنور، أكيد حيكون للمجموعة القليلة اللي قروا تجربته الأولى، فضل كبير في خروجه بالشكل اللي حتشوفه إن شاء الله ادعوا لي ☺️☺️
