بقالي زيادة عن ساعة باعمل مكرونة بالبشاميل؛ عصجت اللحمة، و عملت البشاميل و سلقت المكرونة و جيت في الآخر باحط بشاميل في قاع الصينية - حلوة قاع الصينية دي -،
و بعد كده طبقة المكرونة الأولى و فوقها طبقة اللحمة المفرومة، بدل ما أحط طبقة المكرونة التانية نسيت و حطيت البشاميل اللي المفروض يبقى على الوش، بابص لقيت بقية المكرونة، طب حاعمل إيه دلوقت ؟! حطيت المكرونة و قعدت أدفس فيها عشان تدخل تحت البشاميل، حيبقى منظرها مش حلو أنا عارف ! و عشان الفرن عندي بايظ، و لإن الدنيا حر فكنت باطبخ براحتي يعني، المهم لبست بنطلون و فتحت باب الشقة لقيت جارتي الحاجة فاتحة الباب و قاعدة مع واحدة جارتنا تانية فطلبت منها إنها تحطها في فرنها قالت لي إنه بايظ برضه، و بعدين بقى ؟! قالت لي حتوديها عند واحدة جارتنا، اتحرجت لإن تعاملاتي مع الجيران أصلا محدودة فهي قالت لي لأ دي ست كويسة و مش حتمانع المهم ادعوا لي إنها تطلع حلوة بعد الغلطة اللي حصلت دي لإن أنا طلع عين اللي خلفوني و أنا باعملها و حاسس بآلام في الظهر و الرقبة و البصلة بتاعة العصاج اللي في الأول بوظت لي عيني، كده كده حاكلها و إن شاء الله طعمها يطلع حلو
