انتحار

اتفرجت من قريب على مسلسل أمريكي اسمه (13 سببا لماذا)، المسلسل بيحكي قصة طالب في المرحلة الثانوية بيلاقي على باب بيته في يوم طرد بريد، لما فتحه لقى عدد 7 شرائط تسجيل كل شريط مرقمة أوجهها من 1 إلى 13، ما عدا الوجه الأخير للشريط الأخير فارغ، لما بدأ الاستماع للوجه الأول من الشريط الأول، لقى صوت زميلته اللي انتحرت من مدة بسيطة بتقول فيه على اسمها، و إنه مادام وصلته الشرائط دي؛ فهو أحد أسباب موتها، و قالت إنه لازم يسمع الأوجه بالترتيب و ما يحاولش إنه يجري لحد ما يوصل للوجه اللي بيتكلم عنه يا إما حيتعرض للأذى لإنه مراقب.

المسلسل بدون حرق للأحداث بيوصل رسالة مهمة للجميع؛ مش شرط يكون الأذى و الضرر اللي بتلحقه بشخص يكون عنف جسدي؛ ممكن جدا كلمة قلتها جرحته، إشاعة أطلقتها عليه، ما قدرتش حالته النفسية و شفت إن اللي بيمر بيه شيء تافه و فيه حاجات تانية في الحياة تستحق اهتمامك، مش كده و بس، لأ، أنت ممكن تصرف استخسرت إنك تعمله أو كلمة حلوة استحرمت تقولها له، كانت تخليه يتراجع عن قرار إنه يقتل نفسه عشان يتخلص من الحياة.

فكرة إن الإنسان يحس إنه وحيد، ما فيش حد بيدعمه نفسيا و لا مهتم بيه و لا بمشاعره و لا بأحزانه و معتبرها تافهة و بيستخسر فيه حتى الكلمة الحلوة و بيقول ما أنا بادعمه مثلا بفلوس أو بعيشة كويسة و مرتاحة، له بيت، مش ميت من الجوع و هكذا، البنت بطلة المسلسل، كانت غنية من الناحية المادية، لكنها كانت فقيرة من ناحية كل اللي حواليها.

من كام ساعة شخص من معارفي، نشر على صفحته إن فيه بنت كان يعرفها انتحرت - رمت نفسها من البلكونة -، لما دخلت على صفحتها، كانت آخر حاجة كتباها " يا رب استر"، لما اتصفحت شوية في منشوراتها، لقيتها بتكتب حاجات بتنم عن مدى الألم و المعاناة اللي عايشة فيهم، أنا ما اعرفش قصتها بالظبط و لا إيه اللي حصل لها، لكن أكتر حاجة وجعتني إني لقيتها كاتبة من كام يوم منشور بتتمنى فيه إن ربنا ياخدها عنده، و قبله بكام يوم كانت كاتبة إنها مضغوطة نفسيا و اللي حواليها بيزودوا عليها و قبلها إنه على الرغم من إن حواليها ناس كتير، حاسة إنها لوحدها، و قبله بحوالي شهر إنها لو ماتت و حد قلب في صفحتها و شاف الكلام ده فهي كانت لوحدها و حتفضل لوحدها مع كامل احترامها لأي حد في حياتها.

كتير مننا عايشين في ضغوطات نفسية رهيبة، لكن اللي بيمنعهم من الوصول لمرحلة اليأس التام، هي الدعم النفسي من اللي حواليهم، فيه مننا مش بيلاقي الدعم بالشكل اللي هو محتاجه و ده برضه بيؤدي لحالات الإحباط و القهر و ممكن يوصل للانتحار؛ لإنك ممكن جدا تظن إنك بتقدم لإنسان دعم نفسي و أنت في حقيقة الأمر بتزود و تكمل عليه.

السؤال المهم دلوقت؛ ليه إحنا بننتظر حدوث مصيبة كبيرة عشان نبدأ نتحرك في الوقت اللي مش حتبقى الحركة دي مفيدة فيه ؟ يعني لو شخص إحنا عارفينه بيمر بظروف نفسية صعبة و مش مهتمين بيه بالقدر اللي هو محتاجه، بنستخسر فيه حتى كلمة تشجيع حلوة، بنحاول كمان نقربه من اللي بيحس ناحيته بعدم راحة، هل حننتظر إنه ينتحر و يتخلص من نفسه عشان نقول يا ريتنا كنا عملنا كذا و كذا ؟

البنت من كلامها على حسابها واضح إنها كانت على قدر من التدين و الإيمان بالله؛ فمش معنى إن الشخص واثقين من إيمانه إنه ممكن ما يوصلش لمرحلة إنه ينتحر، كتير لما الإنسان بيحس إن كل أبواب الأمل بتتقفل في وشه، و بيتمنى الموت و مش بيجي له، إنه يتخلص من نفسه و من حياته عشان يترحم من العذاب اللي هو عايش فيه.

اللي باتمناه من أي شخص بيقرا كلامي ده، أنت في إيدك تنقذ حياة إنسان، أي حاجة تقدر تعملها حتى لو بسيطة ما تستخسرهاش؛ في المسلسل اللي شفته، البنت كانت منتظرة من بطل المسلسل إنه يرفض يسيبها لما طلبت منه إنه يمشي، كانت منتظرة إن مسؤول دعم الطلبة ما يسيبهاش تخرج من مكتبه، كانت منتظرة إن حد يعتذر لها عن اللي عمله في حقها، كانت منتظرة مجرد كلمة تخليها ما تتخلصش من حياتها، ما لقيتش حتى الكلمة دي !

ربنا يرحم البنت المسكينة اللي حياتها راحت و هي لسه في عز شبابها، كل اللي بيقرا كلامي ده يفتكر كلام ربنا:

"إِنَّ اللّهَ لاَ يَغْفِرُ أَن يُشْرَكَ بِهِ وَيَغْفِرُ مَا دُونَ ذَلِكَ لِمَن يَشَاء"
صدق الله العظيم
عسى الله يتجاوز و يسامحها و يغفر لها
كلمة أخيرة باوجهها ليها هي، يمكن تكون قادرة تسمعني؛ مش عارف لو كنت موجود في حياتك و من ضمن معارفك هل كان ممكن أقدر أعمل حاجة و لا كنت حاعيش طول عمري ندمان على إني كنت واحد من أسباب موتك، وجعتي قلبي، ربنا يبعدك عن النار و يكتب لك الجنة.