توضيحا للبرنامج اللي ظهرت فيه، عشان استفسارات بعض الناس:-
* البرنامج المفترض كان يبقى وقت عرضه بالفواصل الإعلانية في حدود ساعة و نص - زي البرنامج اللي ظهرت فيه من أربع سنين - لكن لظروف خارجة عن إرادة فريق عمل البرنامج - خلوا وقتنا متقدم بحوالي نص ساعة عشان فيه برنامج تاني أخد نفس المعاد اللي كانت الحلقة حتطلع فيه؛ فإحنا كمجموعة ضيوف ما لحقناش نتكلم كل الكلام اللي عايزين نقوله - اتكروتنا يعني -
* كل ضيف - فيما عدا أنا - كان مخرج و كان كل حد فيهم مجهز الكلام اللي حيقوله، بالنسبة لي أنا كنت مجهز بس الإطار العام اللي حاتكلم فيه، و ما لحقتش أعمل إعداد و تجهيز كامل عشان في حالة لو الوقت كان ضيق؛ إيه اللي المفترض يتقال و إيه اللي ممكن يتم التجاوز عنه
* على سبيل المثال جزئية المنصة 😂😂؛ كنت المفترض حاقول بعدها إن إحنا في طريقنا لإعداد منصة عبارة عن موقع إلكتروني حيضم قاعدة بيانات لصناع الأفلام المستقلة؛ مخرجين و ممثلين، و استأنف كلام عنها، و كنت حاتكلم عن عيوب الأفلام القصيرة من ناحية صناعها و من ناحية عدم رغبة الكثيرين في مجرد حتى مشاهدتها إلى آخره، بس المذيع قاطعني عشان لما كان وصل لي، 😂😂 ما كانش فاضل في وقت الحلقة كتير
* المفترض كنت حاتكلم على وجهة نظري في السادة المخرجين اللي كانوا معايا و أفلامهم؛ يعني ملخصات من المقالات النقدية اللي بانشرها في الفترة الأخيرة، و طبعا كان كل واحد فيهم المفترض حيتعرض له أجزاء من أفلامه، و بعد ما قالوا الوقت مش حيسمح، قالوا ممكن نعرض الملصقات الدعائية الخاصة بيها، كمان الوقت ما سمحش بده 😂😂
* باعتذر لو كانت الحلقة خالفت توقعاتكم، بس هي خالفت توقعاتنا إحنا كمان، و لو حد ما توقعش و انبسط لمجرد إنه شاف العبد لله على قناة حتى لو كانت نسبة مشاهدتها مش عالية؛ فالله يسترك دنيا و أخرى يا شيخ 😂😂
و ادعوا لي، ظني في الله إنه حيوفقني في حاجات أفضل المرات القادمة
