كتاب عذاب القبر للأطفال كان موجود فعلا، لكن نفدت نسخه من حوالي عشر سنوات و لم تتم إعادة طباعته رد دار النشر، كان إن الكتاب بيوضح عذاب القبر للأطفال بشكل مبسط، مش عذاب القبر اللي بيحدث للأطفال زي ما الناس متصورين
يعني بذمة أبوكم ده كلام ؟! مين الحمار اللي قال إننا متصورين أو فاهمين كده ؟!
إيه الفكرة في إنه يتم كتابة كتاب عن عذاب القبر و شرحه للأطفال ؟ مش المفترض إننا نرغبهم في الدين ؟! هل عذاب القبر ده موضوع ينفع الحديث فيه مع الأطفال و لا حتى الكبار ؟! اللي مش قادر أفهمه، ليه ناس معينين شايفين إن تمسكنا بالإيمان بالله و اتباع الأوامر و البعد عن النواهي، حييجي لما نخاف من ربنا مش لما نحبه ؟!
و ليه ده بقى شيء مثبت في تعاملاتنا إحنا أنفسنا كبشر مع بعضنا ؟ الرئيس مع المرؤوسين و المدير مع الموظفين و الأب و الأم مع أبنائهم ؟!
و ييجوا بعد كده ناس يستغربوا ليه فيه كتير بيبعدوا عن الدين و يهربوا منه ؟ ما أنتوا بتكفرونا في عيشتنا و تخوفونا من كل حاجة، حتى من ر بنا الغفور الرحيم ! فين الحديث عن الرحمة و غفران الذنوب ؟! فين الحديث عن ربنا اللي بيقبل توبة العاصي و لو كان غرقان بالذنوب ؟ لما تتم تربية طفل على إنه عارف إن ربنا بيعذب اللي بيعصاه أفضل و لا تربيته على إنه بيكافئ اللي بيقرب له و بيسامحه لو غلط و اعترف بغلطته ؟!
لكن مين يسمع كل ده ؟ ربنا سبحانه و تعالى قال: {وَجَعَلْنَا عَلَى قُلُوبِهِمْ أَكِنَّةً أَنْ يَفْقَهُوهُ وَفِي آذَانِهِمْ وَقْرًا} فمع الأسف، ما فيش فايدة و لا تغيير !
