أصعب شيء إنك ما تلاقيش ثمرة تعبك و مجهودك، تبقى تعبت و علمت و صرفت على ابنك و في الآخر يبقى شخص فاشل،
تتعلم و تدرس و تصرف على مدار سنين كتيرة و في الآخر تتساوى في شغل مع حد بذل أقل منك بكتير، تلاقي عمرك بيعدي و اللي فاضل من شبابك أقل من اللي راح، و مش عارف توصل و لا تحقق أي شيء الأسوأ من كده إنك تلاقي كل دي حالات عامة؛ فمهما حاولت تحسن و تطور من نفسك، ما فيش أمل و لا فايدة، و تلاقي ناس تانيين تعبوا أكتر منك و اتعلموا أكتر و صرفوا أكتر، و منهم زيك و منهم أسوأ ما تبقاش عارف لما تلجأ لربنا و تدعي له، ليه مش بيستجيب؟ ليه الحال بيبقى أسوأ؟ ليه ما فيش أي أمل و لا حتى لمحة صغيرة تخليك ما توصلش لحالة اليأس التامة، لما تحس إن كل اللي حواليك بيزودوا همك و ألمك و معاناتك، ساعات و هما مش قاصدين، و ساعات و هما قاصدين، و ساعات بيتهيألك اللي مش بيحصل، بتبقى قربت من مرحلة الجنون و الانهيار، لكنك بتفضل عايش زي ما انت؛ لإنك لو وصلت لها حتبقى انفصلت عن الواقع و ارتحت، لكن حتى الراحة دي مش حتعرف توصل لها، حتفضل تتعذب بحياتك و بالذنوب اللي منها أنت عملتها و منها اللي غيرك عملها مكتوب عليك دايما الحلم اللي مش حتحققه و الأمل اللي عمرك ما حتوصله
