الصلاة

فيه حاجة مضايقاني جدا و كنت حاسس إني عايز أتكلم فيها لسببين؛ السبب الرئيسي هو تثبيت نفسي و السبب التاني إن جايز كلامي يغير في بعض الناس أو حتى واحد بس منهم؛
معظم الناس اللي أنا أعرفهم مش بيصلوا !

إحنا كلنا بنرتكب ذنوب على الدوام و بنبقى طمعانين في كرم ربنا و رحمته و عفوه، بالإضافة لإننا بننتظر توفيقه في حاجات كتير بنعملها و حاجات تانية بنأمل إنه يجود علينا بيها
لكن كل ده حييجي إزاي لو إحنا قاطعين الحبل الرئيسي اللي بيوصلنا بربنا ؟ الفريضة الأساسية اللي ما ينفعش أي حد أيا كانت حالته إنه ما يعملهاش ؟

جايز لقدرتك المادية إنك تكون مش قادر على الزكاة و لا الحج و جايز مقدرتك الصحية تكون غير قادر على الصيام، لكن الصلاة أيا كانت حالتك مش حتمنعك عنها، ده حتى الشخص المشلول شلل كلي يقدر يصلي !
إحنا الحياة دايما بتاخدنا و بتخلينا نهمل حاجات كتير، و ساعات لبعض التصرفات من المتعصبين و المتشددين بنبقى رافضين من جوانا الدين و كل ما فيه، لكن مهما حصل مننا و مهما كنا بنغلط و نرتكب ذنوب و معاصي، لازم نحافظ على الصلاة.

فيه واحد من الصالحين كان تعرض لسرقة هو و زوجته و كان وقت اقتسام الغنائم، السارقين كانوا بياكلوا ما عدا زعيمهم فسأله مش بتاكل معاهم ليه فقاله إنه صايم فقاله باستغراب بتسرق و بتصوم، قاله مش حابب أقطع و لو حتى صلة واحدة بيني و بين ربنا، لقاه بعد كذا سنة بيصلي في الكعبة و بيستغفر ربنا اللي شاء إنه يخرج من الطريق اللي كان ماشي فيه و يهديه.
ربنا يقدر جميع المصلين بالمحافظة على صلواتهم و يجعل كل المهملين ليها مصلين و يغفر لنا ذنوبنا و يبعد عنا المعاصي.