لكل الناس اللي عجبهم أدائي في الإعلان التجاري اللي مثلت فيه؛ باشكرهم على كلامهم الجميل اللي أرجو إني أكون أستحقه، و باعتذر لو اتأخرت في الرد و التعليق لإني كنت قافل حسابي زي ما معظمكم كانوا عارفين و ما كنتش ناوي أفتحه تاني، لكن عمرو أخويا بلغني بالحفلات اللي معمولة ليا 😂🤣؛ فلقيت إني لازم أدخل و أشكر كل الناس بنفسي
أنا زيكم و الله ما كنتش أعرف إني باعرف أمثل - و مازلت - و لما بعت للإعلان المنشور كان بهدف إنه شغل و ما كانش مذكور فيه إنهم عايزين ممثل، لكني فوجئت بصعوبة الدور خاصة إنه أداء تعبيري بالكامل و مافيهوش كلام حتى إني علقت بإنهم محتاجين ممثل محترف
حاولت أعمل جهدي بإني أرسم الشخصية و طريقة كلامها و تصرفاتها و كانت أول مرة بالنسبة لي أقف قدام كاميرا فما كنتش اتدربت على ده و لكم أن تتخيلوا صعوبة إني المفترض أتجاهل معدات تصوير و إضاءة و طاقم عمل بيوجه و يتكلم و أعتبرهم غير موجودين و أطلع الأداء بشكل مضبوط و إني أول مرة في حياتي أشوف ده مش مجرد أتعامل معاه !
و للي بيقولوا لي إني لازم أكمل تمثيل؛ الموضوع مش بالسهولة اللي أنتم متخيلينها دي، خاصة إن الإعلان منشور لفئة معينة فقط، و صعب إن حد من الحقل الفني يشوفوه و يقدر يوصل لي، بالإضافة إن فيه كتير خريجين معاهد تمثيل و مسرح و ناس بيمثلوا في عروض مستقلة و مش عارفين ياخدوا فرص حقيقية، لكن اللي عايزه ربنا هو اللي حيكون؛ هو قدر يخلق لي فرصة من شيء كنت شايف نفسي إني لا أجيده فلو عايزني أوصل و أكمل في المجال ده، أكيد حيفتح لي سكك له و أنا أكيد ححاول أسعى على قدر طاقتي، لكن الأهم بالنسبة لي حاليا إني أركز في إيجاد فرصة عمل ثابتة بدخل مناسب
شكرا ليكم كلكم على كلامكم و تعليقاتكم الجميلة و لكل الناس اللي اهتموا و اتصلوا بيا و ما اكتفوش بالتعليقات المكتوبة، رغم كتير من الظروف اللي بامر بيها إلا إنكم أسعدتوني و فرحتوني و كنتم أحد أسباب وجودي مرة أخرى في العالم الرقمي، و عقبال العالم الحقيقي إن شاء الله ☺️😊
