بقالي مدة طويلة ما كتبتش، بس فيه حاجة عايز أتكلم فيها مضايقاني جدا، و باعتذر لأي حد ممكن يقرا و يتضايق، المفترض إني حاتم 35 سنة يعني أعتبر لسه مش كبير على إن المجتمع تحصل فيه التغيرات الرهيبة في الأخلاقيات و الذوقيات و التعاملات دي كلها
و أنا طفل و لحد ما وصلت لسن المراهقة و حتى بداية مرحلة الشباب، كان الولد اللي بيشرب سجاير مش بيشربها قدام أبوه أو قدام حد من عيلته أو أصدقاؤه عشان بيحس إنه مكسوف و بيعمل حاجة مش المفروض يعملها. دلوقت بقيت باشوف بنات و سيدات كتير جدا بيشربوا سجاير و شيشة و غيرها عادي جدا قدام كل الناس و لا كإنهم بيعملوا حاجة غلط !
إيه اللي غير المعايير و القيم بتاعتنا بالشكل ده ؟! لو حد قال ده شيء عادي؛ إحنا بقت بتتغير فينا حاجات كتير بالتدريج على مدار السنين و بقينا بنقول الكلمة دي لحد ما الموضوع كتر، لدرجة إننا لو بصينا على المجتمع من عشر سنين بس و رجعنا نبص عليه دلوقت حنلاقي ناس تانيين و مجتمع تاني !
بقت فيه وقاحة في التصرفات و التعاملات و حتى الكلام اللي بيستخدموه الناس بينهم و بين بعض، ناس كتير قالوا من فترة نفس الكلمة "عادي" إننا نستخدم كلمتين أو تلاتة إنجليزي نحشرهم في كلامنا لحد ما الموضوع وصل عند بعض الناس إن بقى العربي هو اللي محشور في كلامهم !
إننا نهمل و نعدي حاجات ممكن نشوفها بسيطة و مش حتفرق لما بتتراكم بتبقى حاجات كتيرة، حنلاقي مع مرور الزمن إن كل أخلاقياتنا و عاداتنا و تقاليدنا اتغيرت و بقينا غير الناس اللي كنا عليهم قبل كده !
فين ناسنا و مجتمعنا ! إحنا نفسنا روحنا فين ؟ حد يعرف يلاقي أي حد مننا !
