السلام عليكم أعتذر أولا لو كنت حاطول عليكم شوية، بس الموضوع شايف إنه يهمنا كلنا
عايز أتكلم في موضوع بنعاني منه كلنا و هو الشغل و الوظايف أنا اللي بتنطبق عليا مقولة سبع صنايع و البخت ضايع فيه حاجات كتيرة جدا باقدر أشتغل فيها و مع كده سوء الحظ ملازمني أنا معايا بكالريوس نظم معلومات إدارية و معادلة مع قسم إدارة أعمال في كلية التجارة؛ يعني المؤهلات الدراسية بتتيح ليا أشتغل في أكتر من مجال متعلقة بالكمبيوتر و الإنترنت و الإدارة، غير إني كاتب و مؤلف، باجيد اللغة العربية الفصحى و باقدر أدرّسها للعرب و الأجانب، باجيد اللغة الإنجليزية و باعرف أترجم، غير إني رياضي بامارس نوعيات معينة من التمرينات و عندي المقدرة أدرب الناس عليها زي اليوجا و البيلاتس و تمرينات اللياقة البدنية الشاملة
لكن عندي أكتر من مشكلة؛ أولا ما عنديش وسايط فكل الوظايف اللي اشتغلتها كانت عن طريق الاختبارات و المقابلات الشخصية و إحنا ما شاء الله عددنا كبير ففكرة النجاح في الحصول على وظيفة من ضمن الأعداد المتقدمة معتمدا على المجهود الذاتي صعبة جدا زي ما كلكم عارفين و لإن فيه شركات و مؤسسات كتير بيعتمدوا على الموضوع ده؛ فغالبا بعد مدة بدل ما يزود الموظف زي ما قانون العمل بيقول بيسعى إنه يخليه يمشي عشان يجيب موظف جديد ياخد نفس الأجر - هو حيقول لنفسه ليه يزود المرتب مادام يقدر يجيب حد تاني بنفس المرتب و حيعمل الشغل بنفس الكفاءة و يمكن أفضل ؟ - تاني مشكلة هي السن؛ أنا عندي 35 سنة و اللي في سني صعب جدا يحصلوا على فرص وظيفية جديدة مع الأسف لإن معظم الوظايف بيشترطوا أعمار أقل
تالت مشكلة المرتبات المتدنية و غير المناسبة لظروف المعيشة؛ ييجي واحد من المديرين أو أصحاب الشركات يقول البداية طبيعي تكون كده، طيب البداية دي لحد لسه متخرج، ما عندوش خبرة، و المفترض تكون في فترة الاختبار بس اللي بتكون كحد أدنى و كحد أقصى برضه 3 شهور، بعدها المفترض لو أثبت الكفاءة، ياخد مرتب يكفي الاحتياجات الأساسية على الأقل، طيب واحد في سني عنده 35 سنة، لما يقدم في شغل و يتقاله المرتب 1200 جنيه لحد 2000، ده كلام يرضي ربنا أو يعقل ؟! أنا عملت كل اللي عملته في حياتي و درست بكالريوس و عملت معادلة و أخدت دورات و اتعلمت لغة أجنبية و رضيت بمرتبات قليلة في بداياتي عشان لما ييجي عمري 35 سنة آخد 2000 جنيه ؟!
رابع مشكلة حاجات كتيرة من اللي باجيدها باترفض فيها لمجرد إن ما فيش معايا شهادة جامعية؛ يعني مثلا أروح لمركز تعليم لغات و أقولهم يختبروني كل الاختبارات اللي عايزينها عشان أثبت كفاءتي، لأ، ياخدوا اللي معاه شهادة أيا كان مستواه، طب شوفوني الأول مش جايز أطلع أحسن ؟ حتخسروا إيه ؟! خامس مشكلة معظم الوظايف - بجانب المرتبات غير المناسبة - بتتطلب ساعات عمل بتضيع اليوم كله فأنت مطالب منك إنك تصحى من النوم تنزل الشغل، ترجع منه تنام عشان تصحى تروح الشغل ؟! ده ربنا نفسه ما طالبش منه إننا نصلي طول الوقت، بالعكس لازم يبقى فيه حياة؛ إحنا بنشتغل عشان نعيش مش بنعيش عشان نشتغل، أيوه من حقي تكون ليا حياة، أقضي وقت كافي مع أسرتي، أشارك في تربية أولادي، أمارس هواية باحبها، حتى أقعد على كرسي في بيتي ما اتحركش من عليه، لكن إنك تستعبدني و تجيب موظف واحد يقوم بوقت موظفين عشان تدفع مرتب واحد بس، ده يرضي ربنا ؟!
آخر شغل كنت باشتغله، كان مشروع مؤقت و كنت عارف ده من البداية، لما قدمت أخدت وعد من المديرين إني حاستمر معاهم، و مع الأسف صدقتهم، كانت النتيجة إني رفضت أكتر من عرض عمل لإني كنت شايف الشغل معاهم على الرغم من إن المرتب غير كافي متميز و بيديني خبرة في أكتر من مجال، كانت إيه النتيجة، دخلت في يوم على أحد المديرين و قلت إني بابحث عن عمل إضافي عشان أزود دخلي و إنه مش حيأثر على شغلي، كان الرد الصادم إني خلاص أقدر أعمل اللي عايزه لإن كده خلاص و مشوا فعلا فريق العمل، و خلفوا وعودهم بالإضافة عدم حصولنا على بدل الانتقالات و المصاريف النثرية ؟! اتقوا الله فينا، ربنا يمهل و لا يهمل آسف إني طولت عليكم مرة تانية و خايف أقول لو حد عنده فرص وظيفية - بعيدة عن التسويق و المبيعات و الكلام الغريب ده - يقدر يساعدني، ألاقي برضه عروض غريبة !
