دارين

صحيح أنا مش أب و يمكن كمان ربنا يكتب لي إني ما أكونش زوج، لكن حابب أقول إن أي أب و أم ممكن يكونوا السبب في اكتشاف مواهب عند أطفالهم أو تنميتها أو على العكس قتلها و القضاء عليها

الأطفال لو اهتمينا بيهم و بتحقيق أمنيات مشروعة بيتمنوها، ممكن جدا تكون السبب في المستقبل إنهم يكونوا في وضعيات أفضل؛ وارد الموهبة تكون بعد كده عمل أو حتى طريقة مفيدة لتقضية وقت الفراغ و إخراج الطاقة السلبية في شكل إيجابي

الحدوتة كانت بدايتها لما دارين قالت لي:
"عمو، أنا حلمت حلم إني عملت برنامج معاك و حطيت الحلقات على اليوتيوب و الناس دخلوا اتفرجوا"
و لإني عانيت من و أنا صغير إن ما حدش اهتم - مع الأسف - بتنمية أي موهبة ليا؛ فقلت لها على طول:
"يالا بينا، خلي ماما بس تلبسك لبس كويس و تسرح لك شعرك و أنا حالبس برضه و أحلق دقني و شنبي 🤣🤣"
و كإن البنت ما صدقت، على طول راحت مشغلة اللاب توب؛ فقلت لها:
"طيب ممكن نجرب في الأول، حاقرا لك قصة مثلا و أنتي اتكلمي معايا و قدميني"
و بعدها حصل اللي اتفرجتوا عليه

فكرة فرحة البنت الصغيرة بتحقيق حلم ليها في أقرب وقت، كان كفيل بإنه يخليني سعيد إني قدرت أعمل حاجة إيجابية، و دارين - ما شاء الله عليها - كانت متجاوبة جدا و عرفت تتكلم، اللي حبيته إن الموضوع يطلع طبيعي بدون تكلف، زي ما باحب دايما أي حاجة، و زي طبيعة الأطفال اللي مش بيعرفوا يزوقوا الكلام و لا يجاملوا، مشاعرهم صادقة و لو لجأوا لحد فلإنهم واثقين إنه حيحقق لهم اللي بيطلبوه، و الحمد لله إن ربنا جعلني سبب في ده

بغض النظر عن كون اللي بنعمله ده مردوده حيبقى عالي و لأ، و هل الناس حيحبوا يشوفوه تاني و لا لأ، دارين طلبت مني إننا نكمل، و قلت لها على كذا حاجة في دماغي و هي متحمسة جدا؛ فإيه آراؤكم ؟ قولوا لي على اقتراحات و أفكار حابينها و ما تنسوش تكتبوا دايما لو ربنا شاء و كملنا المشروع الحلو ده

و لو أي أب و أم بيقروا الكلام ده، يا ريت لو لاحظت عند ابنك رغبة في عمل شيء ما و الشيء ده مشروع و غير مضر، ما تحبطهوش و لا تسخر منه، ساعده و اقف جنبه و يا ريت لو قدرت فعلا تحقق حلمه، صدقني أنت نفسك حتبقى سعيد و حاسس بالفرحة كل ما تشوفها في ملامحه 🥰🥰