من إمبارح و كل الإنترنت مقلوب على شيماء، كنت فاكر الموضوع هزار بما إن اسم شيماء من أكتر الأسماء اللي الناس بيهزروا عليه؛ زي مثلا ما يجيب لك صورة كوباية شاي و جنبها علامة زائد و بعدها كوباية مايه، على أساس إنك تجمعهم في الآخر و يطلع لك شاي ماء 🤣🤣.
و بما إني مش باسمع أغاني حديثة نهائيا حتى للمطربين الراقيين و مطربي الصف الأول؛ فما كنتش فاهم إيه الموضوع؛ لحد ما المبالغة في المنشورات و الكلام لقيته زايد عن الحد فدورت فاكتشف إنها أغنية من أغاني المهرجانات 😏😏 و من ساعتها الدنيا مقلوبة على شيماء.
شفت من شوية فيديو لصحفية من المصري اليوم اسمها شيماء القرنشاوي - و هي واحدة من قرايبي بالمناسبة - بتتكلم فيه عن الموضوع و إن أي شيماء من حقها ترفع قضية على الشخص اللي بيغني اللي مسمي نفسه سوستة ؟! 🙁🙁 لإن ده يعتبر تنمر و بيعرض أي شيماء لأذى نفسي شديد.
أنا ما اتحمستش أتفرج على الأغنية لكن من تحقيق شيماء القرنشاوي عرفت إن قصته بتدور حول شخص بيدور على شيماء في كل حتة و في الآخر بيكتشف المشاهد إنها بطة، و إنه كمان أكلها في الآخر بعد ما خلص الأغنية ؟! فصراحة مش عارف هل الموضوع بيحمل مبالغة و لا لأ !
افتكرت نتيجة حدوتة شيماء، لما المطربة الشهيرة ليلى نظمي في السبعينات عملت أغنية مشهورة جدا اسمها شاويش في الجيش، كانت بتقول في مطلعها:"ما تردي الباب عيب يا مديحة، لأ حاتدارى بالطتريحة" الأغنية دي اتسببت في أذى نفسي و معنوى و تنمر لأي واحدة اسمها مديحة رغم إن الأغنية أنا شخصيا باحبها و دمها خفيف، لكن أي حد كان يشوف واحدة اسمها مديحة كان لازم بيستظرف عليها، و من ضمنهم المدرسين أنفسهم؛
يعني تلاقي مدرس في الفصل مثلا ينادي على طالبة غلبانة اسمها مديحة بعد ما دخل الفصل و ساب الباب بتاعه مفتوح متعمد و يقول لها "ما تردي الباب" و بعد ما الغلبانة تروح تقفله ييجي قايل لها : "عيب يا مديحة !" و يقعد يضحك هو و بقية زمايلها، أبو عسل أمك يا أخي !
الموضوع في النهاية يمكن ناس ياخدوه على أعصابهم و ناس تانيين يعتبروه شيء لطيف و خفيف و يتشاركوا مع الناس في الهزار، لكن أيا كان الوضع إحنا وصلنا لمرحلة سيئة جدا من التنمر بدافع الاستظراف و الغلاسة و إننا نعمل أي شيء عشان نضحك بدون النظر للأذى النفسي اللي ممكن يلحق بالآخرين نتيجته، و ده شيء أتمنى إنه ينتهي من المجتمع عن قريب.