صحيح سني ما كانش صغير لما اتذاع برنامج الأطفال الشهير عالم سمسم، لكني كنت حابب جدا فكرة إن برنامج عالمي يكون الأساس بتاعه معتمد على اللغة العربية و اللهجة المصرية تحديدا.
و لما تابعت حلقاته لقيت البرنامج بيحمل كل شيء جميل؛ بداية من الفكرة و الكتابة و تحريك العرائس و مواءمتها مع البشر، لكن من وجهة نظري أكتر شيء حبيته و أبهرني الأداء الصوتي.
كل اللي بيعملوا في المجال الفني عارفين مدى أهمية التعبير الصوتي و صعوبته، و إحنا كمصريين لينا الفخر بالتميز في المجال ده و تشهد على كده كافة الأعمال العالمية اللي تم دبلجتها باللهجة المصرية و تفوقت على الأعمال الأصلية.
لكن أكتر شخصية من عالم سمسم ارتبطت بيها و حبيتها هي شخصية فلفل نظرا للأداء الصوتي الرائع و المتميز للفنان المبدع الأستاذ وائل عوض Wael Awad اللي مع الأسف ما كنتش أعرف هو مين لحد ما النهارده بس قدرت أوصل له و شرفني بإنه قبل طلب الصداقة اللي بعته ليه.
حضرتك أثرت فيا كتير و أثرت في غيري من الناس و في أكتر من جيل جه من وقت عرض البرنامج و لحد دلوقت، و من حق حضرتك تعرف إن أكتر حاجة نجحت البرنامج هو صوت حضرتك و أداءك اللي مهما قلت مش حاقدر أوفيك حقك.
باشكر حضرتك على كل اللحظات الجميلة اللي قضيتها مع برنامج عالم سمسم و على تميزك و تفردك في أداء شخصية فلفل.