موعد العرض الخاص بالمسرحية اللي بامثل فيها، حيكون نهاية الشهر ده إن شاء الله، لسه ما اتحددش اليوم بالضبط، لكن بإذن الله حاعرفه خلال الأيام القادمة.
و بالمناسبة دي كنت محتاج أكلمكم عن حاجات متعلقة بيها عشان تبقوا على علم بنظام فرق الهواة و لإن فيه ناس طالبين مني إني أدعوهم للعرض؛
ده و الله شيء يسعدني و يشرفني و كنت حابقى حابب جدا إني أعزم كل الناس اللي أعرفهم و حتى اللي ما أعرفهمش، لكن فرق الهواة ما فيش ليها تمويل؛ بيكون كله قائم على الجهود الذاتية؛ بمعنى إن اللي بيشاركوا في العروض بيشاركوا في المصاريف بشكل أو بآخر؛ فيه فرق أعضاءها بيدفعوا تمن إيجار القاعات و خشبة المسرح بالتساوي عليهم، و غيرها بتكون لها طرق تانية عشان يقدروا يستمروا في العروض بدون وجود جهات إنتاجية.
فأنا عشان أخلي أسرتي يحضروا؛ هما أنفسهم حيدفعوا تمن التذاكر، اللي بيتم توزيعها على أعضاء الفرقة اللي بيكونوا بدورهم مسؤولين عن ده لإن طبعا ما فيش نفس شكل الدعايا الخاصة بالمحترفين.
حاجة تانية أحب أكلمكم عنها و هو الدور اللي بالعبه - بدون الدخول في أي تفاصيل تحرق القصة أو الشخصية -؛ المسرحية بتتكلم عن أربع قصص حب مختلفة؛ أنا بطل قصة منها، و الدور ده اتعرض عليا بالإضافة لدور تاني كان بيتميز عنه في جزئية المساحة و عدد المشاهد و الحوار، و كان بيشتمل على عناصر جذب كبيرة تلفت نظر المشاهدين بسهولة؛ فممكن من وجهة نظر حد آخر كان يختار الدور ده لإنه بيدي مساحة أكبر و فرصة أفضل للممثل إنه يظهر قدام الناس.
لكني صراحة ما جذبش انتباهي، و بمعنى آخر ما فيش أي شخصية حبيتها كقارئ عادي غير الشخصية اللي أنا اخترتها و أصريت عليها و المخرج مشكورا وافق على ده؛ حسيت نفسي تقمصت روح إدوارد نورتون لما اتعرض عليه دور جي في فيلم مملكة الجنة اللي هو الشرير الرئيسي في الفيلم، و اختار بدل منه دور الملك بلدوين اللي بيظهر في احداث الفيلم لمدة 17 دقيقة تقريبا من فيلم مدته حوالي ساعتين و ثلث ! 😅😅
طبعا ده مش موجود بالضبط في الشخصية اللي بالعبها لإنها إحدى الشخصيات الرئيسية في المسرحية اللي مدتها مش طويلة زي الفيلم بالمناسبة، لكن صعوبتها في إنها بتمر بتحولات نفسية و محتاجة إتقان في التمثيل عشان تظهر و تبقى مؤثرة و تجذب نظر المشاهدين، و لو ده أنا ما قدرتش أعمله مع الشخصية غالبا حتضيع ما بين الشخصيات الأخرى،
و ده حيكون بالنسبة لي أمر غير مستحب نظرا لإن دي أول مرة أمثل على نطاق واسع بشكل احترافي و في فرقة ليها جمهورها و بتعمل عروض باستمرار من مدة طويلة؛ فكان من الأفضل لو اخترت الظهور الأكبر اللي بتتميز بيه الشخصية الأخرى اللي ما حبيتش ألعبها و اللي كانت ليها مشاهد أكثر و حوارات أطول، منها الطريف و منها القوي اللي أكيد حتبقى عامل مساعد أكتر من شخصيتي في المسرحية.
مش عارف مين في الناس اللي بيقروا كلامي ده حيحضروا العرض، لكن أتمنى من أي حد حيحضر إن شاء الله؛ يبقى يقول لي إذا كنت أصبت في اختياري و لا لأ، و طبعا هل عرفت أأديها على الوجه الأكمل و لا لأ.
آسف لو طولت عليكم؛ باتمنى منكم إنكم تدعوا لي بإن ربنا يوفقني و يبقى العرض ده فاتحة خير عليا، و إني بعده أحتفل معاكم بنجاحي الشخصي بخلاف نجاح العرض نفسه. 🥰🥰
