من وقت ما بدأت شغل مع فرق الهواة فكرت في حاجة مهمة جدا و حبيت إني أعرضها عليكم؛ ليه لازم إحنا ندعم فرق الهواة و نشجعهم ؟
ببساطة إحنا كمجهور عاديين طول الوقت بنشتكي من حاجات كتيرة بقت موجودة حاليا في الفن؛ اللي بتتمثل في القصص ضعيفة المستوى و الأعمال الهابطة و الأفكار المعادة، بالإضافة لشيء آخر و هو إن معظم الوجوه الجديدة في كافة المجالات الفنية من أبناء و أقارب الفنانين المعروفين.
طبعا مش معنى ده إن كلهم بلا موهبة؛ فيه منهم كتير أثبتوا مواهبهم و إنهم يستحقوا اللي وصولوا له، لكن الفكرة في إن الفرص بالنسبة لهم مفتوحة أكتر من المبدعين الآخرين اللي ما لهمش ضهر في الفن أو بمعنى آخر؛ آباؤهم مش من الوسط الفني.
فلو إحنا كجمهور بننتقد الأشياء دي و مع كده بنستسلم للأعمال المعروضة و بنتابعها بحجة إن ما فيش غيرها، بالعكس فيه غيرها و فيه كتير؛
فيه مبدعين آخرين الأضواء غير مسلطة عليهم، و الناس دول حرفيا بيصرفوا من جيوبهم علشان يقدموا إبداعاتهم للجمهور و مش بياخدوا مقابل غير من الناس القليلين اللي بيشاهدوا عروضهم، مقارنة بالناس اللي بيشاهدوا أعمال المشاهير.
فرق الهواة بيصرفوا على إيجار القاعات اللي بيتدربوا فيها و على المسارح اللي بيأجروها لعرض إبداعاتهم عليها، حتى التذاكر بيشتروا الورق و بيدفعوا تمن الطباعة و بيدفعوا كمان توثيق قصص مسرحياتهم و أعمالهم الفنية، و مع كل ده بيكونوا مضطرين إنهم يعرضوا التذاكر بأسعار زهيدة مقارنة بأسعار تذاكر المحترفين، و بيضطروا كمان إنهم يسوقوا لأنفسهم بأنفسهم لإن ما فيش عندهم جهات إنتاجية و لا حتى تسويقية.
و لو منكم تابع أو حضر أي عرض من عروض فرق الهواة حيلاقي إن كتير منها بتتفوق على أعمال بينتجوها المحترفين لإن في كتير من الأحيان أعمال المحترفين بتكون بهدف جني الأرباح - و ده مش كله طبعا -، أما بالنسبة لفرق الهواة فبيكون هدفها الأساسي هو الفن نفسه لإنهم مش بيتحصلوا على أي أرباح، بالعكس بيصرفوا أكتر من جيوبهم عشان أعمالهم تخرج للنور.
بغض النظر عن إني بابدأ أولى خطواتي مع فرق الهواة و لسه أعتبر مش من ضمنهم بشكل كامل حتى الآن، لكني بادعو كل منكم إنه يدعم الناس دول اللي منتشرين في محافظات و بلدان مصر - و حتى في الدول الأخرى - و بيقدموا حرفيا الفن للفن بدون انتظار أي مقابل، غير نظرات الإعجاب و الكلام المشجع و التصفيق من اللي بيحضروا عروضهم.
أول مرة في حياتي أحاول أنشئ وسم - Hashtag -، على أمل إنه ينتشر و يوصل كلامي ده لعدد كبير من الناس.
#دعموا_فرق_الهواة
