منذ ما يزيد على الست سنوات، كنت مسؤول عن محتوى موقع طبي بإحدى شركات المواقع الإلكترونية، و اقترحت على الشركة إنشاء قسم خاص بالرياضة و تأثيراتها العلاجية على الصحة الجسمانية و النفسية للإنسان، و لما تركت العمل معاهم، بدأت أكتب في التمرينات الرياضية من وجهة نظري الشخصية.
و لإني مش باحب الأسلوب الجامد في الكتابة و لا اللي ملتزم بقواعد معينة تحجمني ككاتب؛ فاخترت إني أكتبها بأسلوب قصصي إلى حد ما، باعرض فيها طريقة تعرفي بالرياضة نفسها و بالمدرب و بطريقة جمعي للمعلومات عنها و غيرها،
كان كل همي إن القارئ يُقبل على قراءة الموضوع بدون ما يشعر بملل أو إني باقدم له مجرد معلومات غير مهمة بالنسبة له.
و كتبت حدوتي مع التانجو و نظرتي إليه و اللي كانت تجربة سيئة على مر السنين اللي فاتت، و دعمت ده بمصادر و مراجع لتاريخ التانجو و نشأته و تطوره على مر السنين، و حكاياتي مع المدربين و شركاء الرقص - و لا مؤاخذة يعني 😅😅 -
و على الرغم من إن التانجو لا يُعتبر رياضة في حد ذاتها، لكن يُمكن نسبه ليها بوصفه مجهود حركي و ذهني، و كتبت برضه عن البيلاتس و اليوجا و بعض التمرينات الرياضية الأخرى.
لكن كان عندي مشروع كتابة باحلم بيه، بيتمثل في إني حابب أكتب عن التمرينات الرياضية غير المألوفة و غير المعروفة لكتير من الناس و أربط الحكايات دي ببعض.
و لما اتشرفت بمقابلتي للسيدة و المدربة جميلة الجميلات إيمان السيد Eman ElSaied، و اتمرنت معاها في رياضة غير معروفة و غير منتشرة، حلمي بالمشروع ده رجع تاني، و كنت حابب إني أتكلم عن الرياضة دي من وجهة نظري، لكني اكتشفت إن تقريبا ما حدش اتكلم عنها خالص باللغة العربية لحد دلوقت، حتى المصادر المتوفرة باللغة الإنجليزية غير كافية.
ده في حد ذاته بيخلق قدامي تحديات أكتر؛ أول تحدي إني حاتكلم عن السيدة إيمان و مش عارف هل أنا جدير بشرف الحديث عنها و لا لأ.
و تاني تحدي إني حاتكلم عن تمرينات رياضية ما حدش يعرفها غير اللي اتمرنوها، بصراحة فيه بعض اللي اتمرنوها مش عارفينها برضه 🤣🤣 -.
و تالت تحدي إني أطلع عمل متميز لإن بقالي مدة مش باكتب بشكل كامل زي زمان و حابب إنه يكون على مستوى عالي بغض النظر عن أعداد الناس اللي حيقروه و لمين حيوصل.
و لإن الحدوتة دي حتبقى مرتبطة بالحدوتة السابقة - بشكل أو بآخر -؛ فإن شاء الله حانشر حدوتة التانجو اللي عنونتها بـ "قدْراً يسيراً"، و حابدأ إن شاء الله كتابة الحدوتة الأخرى.
باشكر السيدة و المدربة الرائعة إيمان السيد إنها وافقت لما طلبت منها الحديث عن تمرينها و عنها هي شخصيا و أمدتني بآرائها و معلوماتها و إدتني جزء من وقتها عشان أستكمل مشروع الكتابة اللي حلمت بيه. 🥰🥰
الصورة دي كانت في يوم مفتوح بعد الانتهاء من التمرين مع السيدة إيمان، و اللي بنستخدم فيها العصيان اللي شايفنا ماسكينها دي، حتعرفوا إيه هي الرياضة دي و اسمها كمان و بنستخدم العصيان إزاي في التمرين، قريبا إن شاء الله 😉😉