أنا مش فاهم صراحة السر وراء تحمس الناس المبالغ فيه إني أرفع حلقة القناة الخامسة؛ ده فيه ناس لسه مقابلني النهارده و كلموني عنها 🤣🤣
مع إني شبه واثق إني لما أرفعها ما حدش حيتفرج و لو اتفرج ما حدش حيتفاعل، بس على أي حال عشان تبقوا عارفين إيه اللي حصل و خلاني أروح؛ حاحكي لكم؛
كانت القناة الخامسة من أكتر من 8 سنين أعلنت على صفحتها إن فيه فرص عمل متميزة للخريجين مع مسؤولي توظيف بشركات كبرى بالتعاون مع برنامج بيتعرض عليها اسمه حدوتة شبابية، و كانوا سايبين رقم المخرجة و كاتبين إن ده للتقديم؛ فأنا اتصلت و حددت معايا معاد أروح فيه.
رحت فعلا و أخدت معايا أكتر من نسخة لسيرتي الذاتية، و أول ما وصلت كان فيه توتر في الاستديو فعرفت إن ما فيش حد جه غيري 😅😅
فسألتني المخرجة و قالت لي تحب تطلع في الحلقة ؟ فقلت لها حلقة إيه يا هانم ؟! قالت لي حلقة البرنامج هي حتتعرض على الهوا بعد شوية ! هوا إيه يا هانم بس ؟! أنا جاي عشان أقدم في شغل و مش عارف أصلا الموضوع عن إيه و لا المفروض حاقول إيه ؟! قالت لي دي بسيطة ما تقلقش !
المهم إنه كان فيه واحد تاني عرفت بعد الحلقة إنه قريب واحد من العاملين في القناة، و كانوا مسؤولي التوظيف اتأخروا و الحلقة وقتها جه؛ فما لقوش غيري عشان ينقذوا بيه الموقف 😁😁
دخلت و أنا متوتر لإنها كانت أول مرة أعمل حاجة زي كده و مش متعود على الكاميرات و لا الإضاءات ولا أي حاجة من دي، و أنا في المكان قعدت أقول لنفسي: "اهدى يا أحمد، هدي نفسك، ما تقلقش، ما حدش بيتفرج على القناة الخامسة أساسا و لا حيشوفك و لا حيشوف الفضيحة اللي حتحصل بعد شوية". 😹😹
لكن لإن كان عندي فضول أتفرج على نفسي فرحت متصل بوالدتي و قلت لها: "ماما، أنا حاطلع على الهوا على القناة الخامسة بعد شوية، يا ريت تسجلوا الحلقة".
و عليها دخلت أنا و الشاب اللي كان معايا و قعدنا، و شوية و دخلت المذيعة و بعدها راحوا مشغلين تتر المقدمة و بدأت الحلقة اللي ما كانتش بسيطة و لا حاجة، و يكأن - على رأي طلعت زكريا الله يرحمه - المذيعة ما صدقت لقتني،
بس عشان لما تتفرجوا تصدقوا إن كل ده ما كانش مُعَد ليه و الله و لا اتفقوا معايا حتى على المواضيع الأساسية عشان أعرف أرد حتى ! 😆😆
بعد الفاصل الأول دخل اتنين من مسؤولي التوظيف، و كملت الحلقة لحد ما جه الفاصل الأخير؛ دخل شاب صغير قال جملتين بالعدد، قعدوا كلهم يمدحوا فيه بلا استثناء بشكل غريب، طب و أنا اللي قاعد أنازع من أول الحلقة و اتاخدت على خوانة و اترميت قدام الكاميرات من غير استعداد ؟!
و لما خلصت الحلقة لقيت واحد من مسؤولي التوظيف بيحط إيده على كتف الشاب و بيقول له: "أنت اتأخرت ليه ؟ مش قلت لك تييجي بدري" ؟ 😂😂
و بعد كده كان حدد معايا معاد أروح له شركة في برج العرب، رحت فعلا و عملت مقابلة شخصية، و قالوا لي إنهم حيكلموني، و طبعا ما فيش داعي أقول لكم على الباقي. 😺😺
لسه عايزين تتفرجوا ؟! 🤣🤣
