نفسي أفتكر أنا كنت باصص البصة دي ليه ؟ 😹😹
الصورة كانت من إفطار في رمضان منذ عدة سنوات، مع مجموعة ما قابلتش حد فيهم بعد كده غير اللي حتعرفوه بعد شوية 😆😆
فيه واحدة في المجموعة كنت معجب بيها جدا و قعدت مدة أحاول أوصل لها، أفتكر إني قلبت الفيس كله عليها، لكن ما عرفتش، في الآخر وصلت لواحدة صاحبتها ففكرت و قلت لنفسي: "ليه لأ ما أجرب"، و بعت قلت لها:
"السلام عليكم، يا رب حضرتك تكوني بخير، أنا كنت معاكم في الإفطار و بابعت لك صراحة لإني معجب بواحدة صاحبتك و ما عنديش أي غرض سيء و الله، بس أنا مش عارف اسمها و مش عارف أوصل لها، لكني لقيت حسابك فقلت أبعت لك فلو حضرتك متضايقة من كده بلغيني و مش حاتضايق و لا حابعت لك تاني"،
و رحت باعت لها صورة مجمعة لينا و شاورت على نفسي بسهم عشان تعرفني؛ فردت و قالت لي: "لأ مش متضايقة و الله، طيب قول لي هي مين"
فقلت لها "هي مش واضحة في أي صورة عندي، بس أنا كنت باشوفكم طول الوقت مع بعض و من أسلوبكم في التعامل عرفت إنكم أصحاب".
و بعت لها صورة جماعية و شاورت عليها بسهم برضه، ردت و قالت لي: "مع الأسف هي لسه مخطوبة من قريب" نحس نحس يعني ! ما فيش فايدة ! 🤣🤣
بعد مدة قليلة، أفتكر حوالي شهر من هذه الواقعة، شفتها صدفة في الشارع و تحديدا في نفق قطر سيدي جابر، عملت نفسي ما شفتهاش، لكني لمحت ابتسامة على وشها لما شافتني؛ قلت هل المفترض كنت أكلمها، لكني لقيت إنه ما كانش ينفع بعد اللي قالته صاحبتها بغض النظر عن كونه صحيح أو لأ، لكن الابتسامة وضحت إنها بلغتها 😅😅
حد يشوف لي حل في أم النحس اللي راكبني في الأمور العاطفية دي؛ أخوكم بيضيع 😂😂
ملحوظة عشان فيه واحدة معينة من قرايبي هي عارفة نفسها كويس، حتقعد تدقق في الصورة؛ هي مش موجودة فيها عشان تريحي نفسك 😹😹
