أكتر شيء بيزعجني في شخصيتي إني غير قادر على جذب انتباه الآخرين مهما حاولت و مهما فعلت، و ده أحد الأسباب الرئيسية في عدم نجاحي في الارتباط العاطفي أو حتى استئناف وظيفة أو الإبقاء على صداقة أو زمالة أو أي علاقة في حياتي.
الشيء ده هو اللي بيخليني مش باستكمل غالبا أي عمل أنا بادخل فيه، بالإضافة إلى كوني باتقفل بسهولة و باشعر بالحساسية الشديدة تجاه كتير من التصرفات اللي يُمكن التجاوز عنها.
دلوقت و أنا باحاول أدخل في مجال جديد - باختاره صعب كالعادة - و عشان أزود الصعوبة على نفسي؛ اخترته مجال لازم أنجح في كوني أجذب انتباه الآخرين و أشدهم، و ده بيضعني في منافسة رغما عني، فيها كتير سبقوني، و كتير ناجحين في لفت الأنظار، و ده اللي بافشل فيه بجدارة.
باضيف على ده كمان إن المجال الجديد بيحمل مستوى آخر من الصعوبة؛ و هو نظرة المجتمع ليه المسبوقة بالاتهام دايما، و كونه بيفتح أبواب لكون المرء لازم يخسر فيها شيء معين من حياته، بالنسبة لي قربت جدا على الغرق كُلية و مش عارف إذا كان اللي باعمله حيكون بالنسبة لي طوق نجاة و لا حجر حيشدني لتحت و يعجل بهلاكي !
