موضوع السعي للنجاح رغم افتقار المقومات ده بقى مرعب جدا، و مع الأسف الشديد أصبح سلعة حاليا...
باشوف حسابات على منصات التواصل الاجتماعي كتيرة جدا؛ عليها متابعين بالآلاف، لكن مافيش على منشورات أصحابها أي تفاعل؛ لإن بقى فيه حاجة اسمها شراء متابعين...
بقى فيه كمان تفاعلات بالشراء لمن يرغب؛ تلاقي حسابات أشخاص وهميين بيعملوا تفاعلات على منشورات شخص معين - لو دخلت على حساباتهم حتعرف ده، كلها بتبقى إما جديدة و مافيش عليها أي محتوى يُذكَر -...
حتى قنوات يوتيوب؛ بقى فيه قنوات بتتباع بالكامل بمتابعيها؛ فتلاقي قناة عليها أقل من 20 فيديو، و متابعين لها بالآلاف؛ القنوات دي بعد بيعها بيتم حذف الفيديوهات الأصلية منها، و بعدها بيضع المالك الجديد فيديوهاته عليها، و بالتالي لإن القناة أصلا موجودة في محركات البحث و عليها متابعين قدامى فالفيديوهات الجديدة بتتشاف من عدد كبير من المشاهدين...
إيه المشكلة الكبرى في الموضوع ده ؟ المشكلة هي إنها سدت طرق كتيرة على الناس اللي عايزين يقدموا محتوى فعلا و حابين يكون لهم وجود؛ بقوا مجبرين لو عايزين يتشافوا و محتوياتهم تنتشر؛ إنهم برضه يلجؤوا لنفس الأمر؛ يعني يدفعوا و إلا حيفضلوا زي ما هما، أو يتقدموا بالبطيء، و ده خلى سياسات المشاهدة و الربح تتغير بشكل طبيعي على كافة المنصات و بقت أصعب مع مرور الوقت...
الإنترنت و منصاته؛ فتحوا أبواب لكل حد عشان يظهر، و ده مع الأسف جنى على أصحاب مواهب حقيقية، و على ناس متميزين، و بتدفعهم لليأس و للإحباط !