باحس في نفسي دايما إني شخص غريب؛ على طول قلبي بيميل ناحية الأصعب؛ يعني أكتر أكلة باحبها ورق العنب، و ده صعب جدا في عمايله، فيه ستات مش بيعرفوا يعملوه أساسا😟😟
باحب جدا الطبيعة و الهدوء و المناظر الخلابة، و الحال حوالينا زي ما حضراتكم شايفين كده؛ لا فيه طبيعة و لا فيه هدوء و لا فيه مناظر خلابة... 😏😏أكتر رياضات باحب أمارسها هي رياضات غير متوفرة بكثرة في بلدنا؛ زي اليوجا و البيلاتس و تمرينات اللياقة البدنية اللي بتعتمد على الجسم نفسه لإن معظم الناس عندنا بيهتموا أكتر بالحديد و الأجهزة، و ده بالتالي بيخلي نوعيات الرياضة دي، صعب إني ألاقي لها أماكن أمارسها فيها، أو إنها بتبقى مكلفة... 🥲🥲
حتى في الارتباط العاطفي؛ دايما قلبي بيميل ناحية واحدة ما ينفعش أرتبط بيها أساسا، و لو نفع لازم تظهر مشكلة تمنع الارتباط ده إنه يتم، نحس نحس يعني 🤣🤣
و الحاجات اللي باجيدها كلها عشان تأكل عيش بتحتاج وقت؛ زي الكتابة و التأليف و ده مجال مش بيأكل عيش و مالوش سكة شهرة غير عن طريق الوسايط أو إنك تدفع فلوس عشان تطبع كتب، و حتى لو عملت آخر حاجة دي؛ غالبا ما حدش حيقرا مطبوعاتك غير عينين سيادتك لإن دور النشر مش بتسوق بشكل مثالي غير للمشاهير فقط... 🥸🥸
و طبعا التمثيل اللي الحال - زي ما حضراتكم شايفين -؛ إما إن غالبية اللي بيوصولوا أبناء أو أقارب فنانين، أو بيتشتموا و بيتهزقوا على غلطات عملوها، و لو ما عملوش بيتشتموا برضه... 🤨🤨
و أخرة المتمة؛ لما حبيت أعمل حاجة جديدة سعيا لتطوير نفسي؛ قلبي راح ناحية اللغة المصرية القديمة و حضارتها، اللي هما انقرضوا من آلاف السنين... 😳😳
ملحوظة 2: لا تخرج قبل أن تقول "لا حول و لا قوة إلا بالله" 🤔🤔