من ساعة ما بدأت التمثيل و فيه بعض الأقاويل اللي حابب أرد عليها، لسه مدونتي و قناتي و حسابي يعتبروا جداد، و ما فيش عليهم متابعين كتير، لكن حاكتب ده عشان يفضل لما ربنا يشاء و أنتشر و أتعرف بشكل أكبر...
أنا مش بارفض أشارك مع فرق أو في أعمال معينة نتيجة كبر نفس أو غرور و العياذ بالله - و أي حد عارفني كويس حيعرف إن دي صفات بعيدة عني تماما - لكن فيه عوامل معينة لازم تكون متوفرة في الأعمال اللي باشارك فيها: -
* أولا إني أحب العمل نفسه؛ جايز يكون جيد من وجهة نظر البعض، لكني مش حابه.
* ثانيا أحب دوري فيه؛ فيه أعمال ممكن أحبها لكن الدور لا يجذبني،
و للأمانة ما فيش حد عرض عليا دور صغير أو دور بدون قيمة، على العكس حتى الآن لما حد بيكلمني بيعرض عليا الدور الرئيسي، أو في بعض الأحيان أحد الأدوار الرئيسية لو كان العمل بطولة جماعية.
* ثالثا الالتزام؛ أنا شخص مازلت محتفظ بقيم معينة اتربيت عليها و مستمرة معايا، من ضمنها الالتزام؛ بما يعني إن المسؤول الرئيسي عن العمل يكون ملتزم، المشاركين في العمل يكونوا ملتزمين؛ لإنه مع الأسف، رفضت فعلا بعض الحاجات نتيجة عدم الالتزام.
* رابعا الاحترام؛ بمعنى إني مش حاشتغل مع حد مش بيحترمني و لا بيعطيني قدري،
و ده مش معناه إني لا أستمع للتوجيهات على سبيل المثال أو خلافه لإني باعرف أفرق جدا ما بين التوجيهات الخاصة بالعمل و بين محاولة تصغير الشخص و إهانته،
و من ناحيتي الحمد لله عمري ما باقصر في أي شيء بيطلب مني، على العكس باسعى إني أعمل أكتر لو في استطاعتي - حتى في حياتي العادية -.
* خامسا: - و دي حاجة ناس كتير بيستغربوا منها و فيه اللي بيعتبروها مع الأسف إني باتلكك - و هي التدخين؛
طول عمري مش باطيق التدخين بأنواعه، لكني برضه مصاب بحساسية جيوب أنفية و مش باقدر أتحمل التدخين و الأماكن المغلقة،
و مع الأسف الشديد معظم الوسط الفني - سواء كانوا محترفين أو هواة - بيدخنوا، و أماكن التدريبات و التصوير معظمها بتبقى غير جيدة التهوية،
و ده مؤذي جدا لصحتي، لدرجة إني لما بانطلب أو باقدم في أي شيء أو باروح لأي مكان - حتى لو ما كانش له علاقة بالتمثيل - باستفسر عن موضوع التدخين و مواصفات المكان، و كتير من الناس بيقولوا إنهم بيراعوا ده، و مع الأسف مش بيحصل، و النتيجة إني باتأذى صحيا و باضطر إني أنسحب.
باحب جدا التمثيل و دي حقيقة و الله مش إدعاء؛ إن مش من طموحي أوصل لأعمال المحترفين لإن فيها مشاكل كتير حاليا؛
من ضمنها التجاوزات بأنواعها، و نوعيات الأدوار، و الورق اللي معظمه بقى فيه عيوب قاتلة في كتابة النصوص و الحبكات و رسم الشخصيات،
لكني مش حاعرف أشارك في شيء إلا إذا توفرت العوامل دي، مش من طموحي أمثل مع شخص معين حتى لو كان أكبر ممثل في مصر، طموحي إني أعمل اللي باحبه حتى لو حيوصل لأعداد قليلة من الناس،
و ربنا أكيد هو اللي بيوفق و أنا كإنسان بإيدي السعي و الاجتهاد فقط.