محتاج أوضح حاجة مهمة جدا هنا، مع احترامي لكافة الآراء؛ بشأن حديث بعض الناس إن عبد الحليم رفض يعيد غناء جبار نتيجة إنه كان خايف صوته يتشرخ و ما يقدرش يغنيها؛
عبد الحليم فعلا قال كده لمحمد الموجي بس مش عشان سبب إنه خايف صوته ما يجيبش الأغنية لإنه غنى أغاني كتير أصعب من جبار بمراحل زي موعود و قارئة الفنجان على سبيل المثال،
لكن الأغنية نفسها لما عبد الحليم غناها فشلت في وقتها بسبب إنها كانت سابقة عصرها، و الناس ما قدروش يستوعبوا الأغنية في وقتها، و فيه حديث لوجدي الحكيم بيتكلم فيه عن ردود فعل أصدقائه و الناس حول الأغنية لما سمَّعها لهم قبل تسجيلها، و قال لوجدي الحكيم إنه حيترحم عليه بعد عشرين سنة لما يشوف نجاح الأغنية دي، و ده فعلا اللي حصل و جبار بقت من أشهر و أنجح أغاني عبد الحليم.
عبد الحليم كان بيرفض يغني الأغاني اللي عارف إن الجمهور حتبقى ردود أفعاله عليها أقل من اللي متوقعه لإن تجاوب الناس معاه مهم جدا و هو كان عارف إن الأغنية ما نجحتش مع الناس، و فيه أغاني كتير له لم يُعد غناءها و هي أغاني أقل في الصعوبة من جبار زي باحلم بيك و بلاش عتاب و اسبقني يا قلبي و غيرها؛
فمكانش حيجبر الناس عليها و هو عارف إن ردود أفعالهم و هو بيغني مش حتكون على قدر الأغاني التانية، و طبيعي يقول لمحمد الموجي سبب آخر لعدم إعادة غناء الأغنية عشان ما يجرحهوش؛ مش حيقول للملحن إن الأغنية ما نجحتش مع الناس و هو عارف ردود أفعالهم السلبية تجاهها.